جو نظر کامیاب ہوتی ہے

جو نظر کامیاب ہوتی ہے

آپ اپنا جواب ہوتی ہے

زندگی جب عذاب ہوتی ہے

عاشقی کامیاب ہوتی ہے

تیرے آگے لطافت شبنم

شرم سے آب آب ہوتی ہے

روکئے اپنی مست نظروں کو

ساری دنیا خراب ہوتی ہے

جس صراحی کو چھو لیا تونے

غیرت آفتاب ہوتی ہے

یوں نہ موجوں سے کھیل اے غافل

زندگانی حباب ہوتی ہے

اس چمن کی بہار کیا کہنا

پنکھڑی بھی گلاب ہوتی ہے

تجھ سے ظالم کو پیار کرتا ہے

جس کی قسمت خراب ہوتی ہے

بڑھتے جاتے ہیں ان کے رخ کے نقاب

ہر نظر اک حجاب ہوتی ہے

ناز ہے دل کی بیکلی پہ مجھے

شوخیوں کا جواب ہوتی ہے

مست آنکھوں کا دھیان آتا ہے

سامنے جب شراب ہوتی ہے

ان کے عاشق کی زندگی ماہرؔ

کتنی نا کامیاب ہوتی ہے