wo ‘arbada jo masum ada qatil bhi hai aur qatil bhi nahin

vo ‘arbada jo ma.asūm adā qātil bhī hai aur qātil bhī nahīñ

dil us kī adā-e-sādā kā bismil bhī hai aur bismil bhī nahīñ

va.ade pe nahīñ aatā sach hai par yaad to us ko aatī hai

us jān-e-mohabbat kā va.ada bātil bhī hai aur bātil bhī nahīñ

dekho to har ik se begāna samjho to kisī kā dīvāna

dil yaar kī bazm-e-ishrat meñ shāmil bhī hai aur shāmil bhī nahīñ

zāhir meñ har ik shai par qabza bātin meñ na zarra bhī bas kā

duniyā meñ hamārī hastī kā hāsil bhī hai aur hāsil bhī nahīñ

har dil hai nasheman kāshāna us par bhī tabāh-o-vīrāna

us jān-e-jahāñ ke jalvoñ kī manzil bhī hai aur manzil bhī nahīñ

dīvāna magar ahal-e-irfāñ tārīk magar mahr-e-tābāñ

dil terī nigāh-e-ulfat ke qābil bhī hai aur kābul bhī nahīñ

īqān-e-tazabzub kā zaḳhmī irfāñ kī shu'ā.en dhundlī sī

duniyā tirī raushan hastī kī qaa.il bhī hai aur qaa.il bhī nahīñ

hai jazba-e-kāmil ke dam tak nazzāre kī ye firdaus-garī

ai qais bagūlā sahrā kā mahmil bhī hai aur mahmil bhī nahīñ

'irfān-e-ḳhudī hai ain-e-baqā ehsās-e-ḳhudī paiġhām-e-fanā

hastī mirī rāh-e-ulfat meñ haa.il bhī hai aur haa.il bhī nahīñ

jo Duub gayā vo paar utrā jo sat.h pe thā vo tar na sakā

dariyā-e-mohabbat kā 'māhir' sāhil bhī hai aur sāhil bhī nahīñ

wo ‘arbada jo masum ada qatil bhi hai aur qatil bhi nahin

dil us ki ada-e-sada ka bismil bhi hai aur bismil bhi nahin

wade pe nahin aata sach hai par yaad to us ko aati hai

us jaan-e-mohabbat ka wada baatil bhi hai aur baatil bhi nahin

dekho to har ek se begana samjho to kisi ka diwana

dil yar ki bazm-e-ishrat mein shamil bhi hai aur shamil bhi nahin

zahir mein har ek shai par qabza baatin mein na zarra bhi bas ka

duniya mein hamari hasti ka hasil bhi hai aur hasil bhi nahin

har dil hai nasheman kashana us par bhi tabah-o-virana

us jaan-e-jahan ke jalwon ki manzil bhi hai aur manzil bhi nahin

diwana magar ahal-e-irfan tarik magar mahr-e-taban

dil teri nigah-e-ulfat ke qabil bhi hai aur kabul bhi nahin

iqan-e-tazabzub ka zaKHmi irfan ki shu'aen dhundli si

duniya teri raushan hasti ki qail bhi hai aur qail bhi nahin

hai jazba-e-kaamil ke dam tak nazzare ki ye firdaus-gari

ai qais bagula sahra ka mahmil bhi hai aur mahmil bhi nahin

'irfan-e-KHudi hai ain-e-baqa ehsas-e-KHudi paigham-e-fana

hasti meri rah-e-ulfat mein hail bhi hai aur hail bhi nahin

jo Dub gaya wo par utra jo sath pe tha wo tar na saka

dariya-e-mohabbat ka 'mahir' sahil bhi hai aur sahil bhi nahin