etibar-e-bandagi ko tabkai ruswa karen

e'tibār-e-bandagī ko tābkai rusvā kareñ

aao un ke āstāñ par āḳhirī sajda kareñ

un ke bīmār-e-mohabbat kaahe ko shikvā kareñ

vo agar thoḌī sī bhī taklīf farmāyā kareñ

tā-kujā ba-gardish-e-shām-o-sahar dekhā kareñ

ai nigāh-e-shauq ik duniyā na.ī paidā kareñ

apnā ye maqdūr hī kab hai tujhe rusvā kareñ

dard-e-āñsū ban ke zāhir ho to us ko kyā kareñ

aah par ḳhafagī munāsib ashk par ta.ane bajā

kaash vo be-tābī-e-dil kā bhī andāzā kareñ

jazba-e-mansūr to apnā fasāna kah gayā

ab use ahl-e-jahāñ jis tarah bhī samjhā kareñ

ishq meñ un kī navāzish kā sahārā kiyā zarūr

Dūbnā Thahrā to sāhil kī tamannā kyā kareñ

sub.h hote hī na jaane kaun detā hai payām

is kī būñdeñ kiran meñ jazb ho jaayā kareñ

kaash ab is silsila kī lae na TuuTe hashr tak

mere ḳhat jaayā kareñ un ke payām aayā kareñ

sab kī āñkhoñ se chhupā kar aao sab kuchh dekh leñ

chashm nargis ban ke is duniyā kā nazāra kareñ

ai mire josh-e-junūñ ab aur koī mashġhala

dāmanoñ kī dhajjiyoñ se kab tak khelā kareñ

hazrat-e-nāseh mohabbat nashsha-e-sahbā nahīñ

aap samjhāte haiñ 'māhir' ko to samjhāyā kareñ

e'tibar-e-bandagi ko tabkai ruswa karen

aao un ke aastan par aaKHiri sajda karen

un ke bimar-e-mohabbat kahe ko shikwa karen

wo agar thoDi si bhi taklif farmaya karen

ta-kuja ba-gardish-e-sham-o-sahar dekha karen

ai nigah-e-shauq ek duniya nai paida karen

apna ye maqdur hi kab hai tujhe ruswa karen

dard-e-ansu ban ke zahir ho to us ko kya karen

aah par KHafagi munasib ashk par tane baja

kash wo be-tabi-e-dil ka bhi andaza karen

jazba-e-mansur to apna fasana kah gaya

ab use ahl-e-jahan jis tarah bhi samjha karen

ishq mein un ki nawazish ka sahaara kiya zarur

Dubna Thahra to sahil ki tamanna kya karen

subh hote hi na jaane kaun deta hai payam

is ki bunden kiran mein jazb ho jaya karen

kash ab is silsila ki lae na TuTe hashr tak

mere KHat jaya karen un ke payam aaya karen

sab ki aankhon se chhupa kar aao sab kuchh dekh len

chashm nargis ban ke is duniya ka nazara karen

ai mere josh-e-junun ab aur koi mashghala

damanon ki dhajjiyon se kab tak khela karen

hazrat-e-naseh mohabbat nashsha-e-sahba nahin

aap samjhate hain 'mahir' ko to samjhaya karen