masti-nawaz shoKHi andaz-e-kafirana

mastī-navāz shoḳhī andāz-e-kāfirāna

zulfeñ siyah-ghaTā.eñ āñḳheñ sharāb-ḳhāna

ab us se chāhtā hai phir aur kyā zamāna

jis ne luTā diyā hai ummīd kā ḳhazāna

pūchho na ham-nashīno mujh se mirā fasāna

jaltā rahā nasheman dekhā kaisā zamāna

kis dhun meñ gā rahī hai au zindagī tarāna

āvāz de rahā hai guzrā huā zamāna

saaqī tirī nazar kā allāh re fasāna

sāġhar meñ āgayā hai khiñch kar sharāb-ḳhāna

naqsh-e-qadam pe saarī duniyā jhukī huī hai

zālim tirī ḳhudā.ī kāfir tirā zamāna

aa ai nigār-e-fitrat rūh-o-ravān-e-ulfat

suunā paḌā huā hai dil kā nigār-ḳhāna

ik turbat-e-shikasta nazroñ ke sāmne hai

vo yaad kar rahe haiñ bhūlā huā fasāna

sajdoñ kā vāsta bhī haa.il nahīñ rahā hai

ab maiñ huuñ aur tum ho sar hai na āstāna

ab āñdhiy.oñ ke jhoñke us ko uḌā rahe haiñ

phūloñ meñ tul rahā thā kal tak jo āshiyāna

chhuTte hī phir qafas se laayā gayā qafas meñ

mujh ko na raas aayā gulshan kā āb-o-dānā

allāh re chaman kā zīnat-tarāz manzar

shāḳhoñ kī Doriyāñ haiñ phūloñ kā shāmiyāna

ik dil bhī aaj qāyam apnī jagah nahīñ hai

mumkin hai chuuk jaa.e qātil tirā nishāna

mil jaa.e mujh ko māhir ai kaash zindagī meñ

ik jazb-e-vālhāna ik soz-e-'ārifāna

masti-nawaz shoKHi andaz-e-kafirana

zulfen siyah-ghaTaen aanKHen sharab-KHana

ab us se chahta hai phir aur kya zamana

jis ne luTa diya hai ummid ka KHazana

puchho na ham-nashino mujh se mera fasana

jalta raha nasheman dekha kaisa zamana

kis dhun mein ga rahi hai au zindagi tarana

aawaz de raha hai guzra hua zamana

saqi teri nazar ka allah re fasana

saghar mein aagaya hai khinch kar sharab-KHana

naqsh-e-qadam pe sari duniya jhuki hui hai

zalim teri KHudai kafir tera zamana

aa ai nigar-e-fitrat ruh-o-rawan-e-ulfat

suna paDa hua hai dil ka nigar-KHana

ek turbat-e-shikasta nazron ke samne hai

wo yaad kar rahe hain bhula hua fasana

sajdon ka wasta bhi hail nahin raha hai

ab main hun aur tum ho sar hai na aastana

ab aandhiyon ke jhonke us ko uDa rahe hain

phulon mein tul raha tha kal tak jo aashiyana

chhuTte hi phir qafas se laya gaya qafas mein

mujh ko na ras aaya gulshan ka aab-o-dana

allah re chaman ka zinat-taraaz manzar

shaKHon ki Doriyan hain phulon ka shamiyana

ek dil bhi aaj qayam apni jagah nahin hai

mumkin hai chuk jae qatil tera nishana

mil jae mujh ko mahir ai kash zindagi mein

ek jazb-e-walhana ek soz-e-'arifana