har sar hai teri zulf ka sauda liye hue

har sar hai terī zulf kā saudā liye hue

sub.h-e-haram hai shām-e-kalīsā liye hue

merī nigāh-e-ijz tamāsha liye hue

thā har nazar meñ tuur kā jalva liye hue

bīmār-e-hijr niiñd qiyāmat kī so gayā

āñkhoñ meñ intizār kī duniyā liye hue

au sāhib-e-nazar nigah-e-yak-nagar se dekh

qatra bhī hai haqīqat-e-dariyā liye hue

aayā huuñ aaj maiñ bhī tirī jalva-gāh meñ

dhuñdlā sā ek naqsh-e-tamannā liye hue

au be-vafā fareb aur aisā khulā fareb

va.ade haiñ e'tibār kī duniyā liye hue

ai dost chāk-e-dāman yūsuf kā vāsta

aa jā kabhī to dast-e-zuleḳhā liye hue

saaqī kī chashm-e-mast ne phir laḌkhaḌā diyā

uThā thā laġhzishoñ kā sahārā liye hue

'māhir' hai is ke sāmne ka.aba bhī sajda rez

jo dil hai aks-e-gumbad-e-kHizra liye hue

har sar hai teri zulf ka sauda liye hue

subh-e-haram hai sham-e-kalisa liye hue

meri nigah-e-ijz tamasha liye hue

tha har nazar mein tur ka jalwa liye hue

bimar-e-hijr nind qiyamat ki so gaya

aankhon mein intizar ki duniya liye hue

au sahib-e-nazar nigah-e-yak-nagar se dekh

qatra bhi hai haqiqat-e-dariya liye hue

aaya hun aaj main bhi teri jalwa-gah mein

dhundla sa ek naqsh-e-tamanna liye hue

au be-wafa fareb aur aisa khula fareb

wade hain e'tibar ki duniya liye hue

ai dost chaak-e-daman yusuf ka wasta

aa ja kabhi to dast-e-zuleKHa liye hue

saqi ki chashm-e-mast ne phir laDkhaDa diya

uTha tha laghzishon ka sahaara liye hue

'mahir' hai is ke samne kaba bhi sajda rez

jo dil hai aks-e-gumbad-e-kHizra liye hue