dar-haqiqat inqilab-e-zindagi eajaz hai

dar-haqīqat inqilāb-e-zindagī e.ajāz hai

zarra zarra ḳhāk-e-hastī kā jahān-e-rāz hai

intihā-e-dard-e-dil hai ibtidā-e-ārzū

maut kahte haiñ jise vo ishq kā āġhāz hai

ho chukī bīmar-e-ulfat ko tasallī ho chukī

ek duzdīda nazar vo bhī ġhalat-andāz hai

aap ne jo kuchh kyā achchhā kyā maiñ kyā kahūñ

faisla duniyā karegī kaun duniyā-sāz hai

be-nishānī kā ye a.alam hai nishāñ miltā nahīñ

hastī-e-mauhūm goyā daur kī āvāz hai

uf vo dard-e-dil mudāvā jis kā ho saktā nahīñ

haaye vo bīmār jis kā dard chārasāz hai

Dar rahā huuñ husn-o-ulfat meñ tasādum ho na jaa.e

sāmne nazroñ ke 'māhir' ik sarāpā naaz hai

dar-haqiqat inqilab-e-zindagi eajaz hai

zarra zarra KHak-e-hasti ka jahan-e-raaz hai

intiha-e-dard-e-dil hai ibtida-e-arzu

maut kahte hain jise wo ishq ka aaghaz hai

ho chuki bimar-e-ulfat ko tasalli ho chuki

ek duzdida nazar wo bhi ghalat-andaz hai

aap ne jo kuchh kya achchha kya main kya kahun

faisla duniya karegi kaun duniya-saz hai

be-nishani ka ye aalam hai nishan milta nahin

hasti-e-mauhum goya daur ki aawaz hai

uf wo dard-e-dil mudawa jis ka ho sakta nahin

haye wo bimar jis ka dard chaarasaz hai

Dar raha hun husn-o-ulfat mein tasadum ho na jae

samne nazron ke 'mahir' ek sarapa naz hai