agar fitrat ka har andaz be-bakana ho jae

agar fitrat kā har andāz be-bākāna ho jaa.e

hujūm-e-rañg-o-bū se aadmī dīvāna ho jaa.e

karam kaisā sitam se bhī na vo begāna ho jaaye

maiñ Dartā huuñ mohabbat meñ kahīñ aisā na ho jaaye

mujhe is anjuman meñ baar pākar ab ye ḳhadsha hai

mirā andāz-e-betābī na gustāḳhāna ho jaa.e

nigāh-e-mast saaqī ik tilism-e-rañg-o-mastī hai

kahīñ paimāna ban jaaye kahīñ mai-ḳhāna ho jaaye

samajh kar hosh se begāna honā bhī hai nā-dānī

vo aaqil hai jo be-samjhe hue dīvāna ho jaaye

yañh bhī kuchh nigāheñ tishna-e-dīdār haiñ saaqī

idhar bhī ek daur-e-nargis-e-mastāna ho jaaye

maiñ kahtā huuñ na tum paiġhām bhejo apne aane kā

usī dhoke meñ bīmār-e-alam achchhā na ho jaaye

maiñ is mahfil kī tohmat kis tarah āḳhir uThā.ūñgā

ḳhamoshī bhī jahāñ afsāna-dar-afsāna ho jaaye

naqāb ulTe hue ik roz gar vo ḳhud chale aa.eñ

siyah-ḳhāna mirā 'māhir' tajallī-ḳhāna ho jaaye

agar fitrat ka har andaz be-bakana ho jae

hujum-e-rang-o-bu se aadmi diwana ho jae

karam kaisa sitam se bhi na wo begana ho jaye

main Darta hun mohabbat mein kahin aisa na ho jaye

mujhe is anjuman mein bar pakar ab ye KHadsha hai

mera andaz-e-betabi na gustaKHana ho jae

nigah-e-mast saqi ek tilism-e-rang-o-masti hai

kahin paimana ban jaye kahin mai-KHana ho jaye

samajh kar hosh se begana hona bhi hai na-dani

wo aaqil hai jo be-samjhe hue diwana ho jaye

yanh bhi kuchh nigahen tishna-e-didar hain saqi

idhar bhi ek daur-e-nargis-e-mastana ho jaye

main kahta hun na tum paigham bhejo apne aane ka

usi dhoke mein bimar-e-alam achchha na ho jaye

main is mahfil ki tohmat kis tarah aaKHir uThaunga

KHamoshi bhi jahan afsana-dar-afsana ho jaye

naqab ulTe hue ek roz gar wo KHud chale aaen

siyah-KHana mera 'mahir' tajalli-KHana ho jaye