unki nigah-e-mast se maKHmur ho gae

un kī nigāh-e-mast se maḳhmūr ho ga.e

itne hue qarīb ki ham duur ho ga.e

aayā shabāb aur vo maġhrūr ho ga.e

apne nasha meñ aap hī vo chuur ho ga.e

kuchh ham bhī ro.ab-e-husn se jur.at na kar sake

kuchh vo bhī pās-e-sharam se majbūr ho ga.e

un ke karam ne dāġh-e-tamannā atā kiye

ham bhī jahāñ meñ sāhib-e-maqdūr ho ga.e

us dil ke iltifāt ne ġhārat kyā mujhe

vo be-niyāz ban ga.e maġhrūr ho ga.e

'māhir' vo aa.e qismat-e-manzil chamak uThī

zarre faroġh-e-nūr se ma.amūr ho ga.e

un ki nigah-e-mast se maKHmur ho gae

itne hue qarib ki hum dur ho gae

aaya shabab aur wo maghrur ho gae

apne nasha mein aap hi wo chur ho gae

kuchh hum bhi roab-e-husn se jurat na kar sake

kuchh wo bhi pas-e-sharam se majbur ho gae

un ke karam ne dagh-e-tamanna ata kiye

hum bhi jahan mein sahib-e-maqdur ho gae

us dil ke iltifat ne ghaarat kya mujhe

wo be-niyaz ban gae maghrur ho gae

'mahir' wo aae qismat-e-manzil chamak uThi

zarre farogh-e-nur se mamur ho gae