ان کی نگاہ مست سے مخمور ہو گئے

ان کی نگاہ مست سے مخمور ہو گئے

اتنے ہوئے قریب کہ ہم دور ہو گئے

آیا شباب اور وہ مغرور ہو گئے

اپنے نشہ میں آپ ہی وہ چور ہو گئے

کچھ ہم بھی رعب حسن سے جرأت نہ کر سکے

کچھ وہ بھی پاس شرم سے مجبور ہو گئے

ان کے کرم نے داغ تمنا عطا کئے

ہم بھی جہاں میں صاحب مقدور ہو گئے

اس دل کے التفات نے غارت کیا مجھے

وہ بے نیاز بن گئے مغرور ہو گئے

ماہرؔ وہ آئے قسمت منزل چمک اٹھی

ذرے فروغ نور سے معمور ہو گئے