ishq ki zindagi ko kya kahiye

ishq kī zindagī ko kyā kahiye

apnī qismat kisī ko kyā kahiye

un laboñ kī hañsī ko kyā kahiye

phuul kī pañkhuḌī ko kyā kahiye

ik zarā sī ummīd par ye haal

aadmī kī ḳhushī ko kyā kahiye

sāmne ashk rez hai shabnam

muskurātī kalī ko kyā kahiye

pursish-e-hāl-e-dil hai hañs hañs kar

us kī zālim hañsī ko kyā kahiye

husn par 'etimād-e-chārāgarī

ishq kī sādgī ko kyā kahiye

un kī chilman ko chhū rahī hai nigāh

jur.at-e-āshiqī ko kyā kahiye

mauj-e-bād-e-sabā bhī kaañp uThī

zulf kī barhamī ko kyā kahiye

un ke ruḳh par nazar nahīñ jamtī

chāñd kī raushnī ko kyā kahī.ye

vo pashemāñ ho ga.e 'māhir'

aap kī shā.irī ko kyā kahiye

ishq ki zindagi ko kya kahiye

apni qismat kisi ko kya kahiye

un labon ki hansi ko kya kahiye

phul ki pankhuDi ko kya kahiye

ek zara si ummid par ye haal

aadmi ki KHushi ko kya kahiye

samne ashk rez hai shabnam

muskuraati kali ko kya kahiye

pursish-e-haal-e-dil hai hans hans kar

us ki zalim hansi ko kya kahiye

husn par 'etimad-e-chaaragari

ishq ki sadgi ko kya kahiye

un ki chilman ko chhu rahi hai nigah

jurat-e-ashiqi ko kya kahiye

mauj-e-baad-e-saba bhi kanp uThi

zulf ki barhami ko kya kahiye

un ke ruKH par nazar nahin jamti

chand ki raushni ko kya kahiye

wo pasheman ho gae 'mahir'

aap ki shairi ko kya kahiye