KHak ke kuchh muntashir zarron ko insan kar diya

ḳhaak ke kuchh muntashir zarroñ ko insāñ kar diyā

us ne jis jalve ko jab chāhā numāyāñ kar diyā

us ne hañs kar ḳhud hī zulfoñ ko pareshāñ kar diyā

maiñ ye samjhā maiñ ne qātil ko pashemāñ kar diyā

mausam-e-gul meñ ye kyā ai yād-e-jānāñ kar diyā

mere chāk-e-dil ko phūloñ kā garebāñ kar diyā

nā-umīdī ke charāġhoñ ko farozāñ kar diyā

us ne dil kī āḳhrī mushkil ko āsāñ kar diyā

ḳhaak ke parde meñ insāñ ban ke zāhir hoga.ī

vo tajallī jis ne ā.īnoñ ko hairāñ kar diyā

ruḳh pe zulfeñ chhoḌ kar vo muskurā.e is tarah

kufr to phir kufr hai īmāñ ko īmāñ kar diyā

aah niklī thī ki dil kī aaḌ se aa.ī sadā

tū ne phir nādāñ shikast-e-'ahd-o-paimāñ kar diyā

ik payām-e-'ishq hai 'māhir' mirī fikr-e-suḳhan

sher ke parde meñ dard-e-dil numāyāñ kar diyā

KHak ke kuchh muntashir zarron ko insan kar diya

us ne jis jalwe ko jab chaha numayan kar diya

us ne hans kar KHud hi zulfon ko pareshan kar diya

main ye samjha main ne qatil ko pasheman kar diya

mausam-e-gul mein ye kya ai yaad-e-jaanan kar diya

mere chaak-e-dil ko phulon ka gareban kar diya

na-umidi ke charaghon ko farozan kar diya

us ne dil ki aaKHri mushkil ko aasan kar diya

KHak ke parde mein insan ban ke zahir hogai

wo tajalli jis ne aainon ko hairan kar diya

ruKH pe zulfen chhoD kar wo muskurae is tarah

kufr to phir kufr hai iman ko iman kar diya

aah nikli thi ki dil ki aaD se aai sada

tu ne phir nadan shikast-e-'ahd-o-paiman kar diya

ek payam-e-'ishq hai 'mahir' meri fikr-e-suKHan

sher ke parde mein dard-e-dil numayan kar diya