hijr mein bimar-e-gham sahne ke qabil ho gaya

hijr meñ bīmār-e-ġham sahne ke qābil ho gayā

mudda.ā-e-shauq be-tābī se hāsil ho gayā

dard ko bhī dard kā ehsās hāsil ho gayā

muzda ai qātil ki phir paidā nayā dil ho gayā

jab khulīñ āñkheñ to dekhā vo sar-e-bālīñ na the

hosh aanā thā ki phir bīmār ġhāfil ho gayā

is zubūñ hālat pe bhī josh-e-mohabbat kam nahīñ

vo to qātil the hī merā dil bhī qātil ho gayā

hashr ho jaatā hai bapā un ke ġhurūr-e-husn se

vo to ye kahiye ki ā.īna muqābil ho gayā

maiñ ne jab kahā tūfān-e-ġham meñ yā-ḳhudā

mauj kashtī ban ga.ī girdāb sāhil ho gayā

hijr mein bimar-e-gham sahne ke qabil ho gaya

muddaa-e-shauq be-tabi se hasil ho gaya

dard ko bhi dard ka ehsas hasil ho gaya

muzda ai qatil ki phir paida naya dil ho gaya

jab khulin aankhen to dekha wo sar-e-baalin na the

hosh aana tha ki phir bimar ghafil ho gaya

is zubun haalat pe bhi josh-e-mohabbat kam nahin

wo to qatil the hi mera dil bhi qatil ho gaya

hashr ho jata hai bapa un ke ghurur-e-husn se

wo to ye kahiye ki aaina muqabil ho gaya

main ne jab kaha tufan-e-gham mein ya-KHuda

mauj kashti ban gai girdab sahil ho gaya