fursat-e-aghi bhi di lazzat-e-be-KHudi bhi di

fursat-e-āghī bhī dī lazzat-e-be-ḳhudī bhī dī

maut ke saath saath hī aap ne zindagī bhī dī

soz-e-darūñ atā kiyā jur.at-e-āshiqī bhī dī

un kī nigāh-e-nāz ne ġham hī nahīñ ḳhushī bhī dī

us ne niyāz-o-nāz ke sāya-e-varq ulaT diye

dast-e-ḳhalīl bhī diyā san.at-e-āzrī bhī dī

phir bhī mirī nigāh meñ dūnoñ jahāñ siyāh nahīñ

merī shab-e-firāq ko chāñd ne raushnī bhī dī

aap ne ik nigāh meñ sab ko nihāl kar diyā

phuul ko muskurāhaTeñ mauj ko be-kalī bhī dī

chhīn lo mujh se dosto tāqat-e-'arz-e-mudda.ā

us ne mizāj-e-yār ko dāvat-e-barhamī bhī dī

dām-e-ta.ayyunāt meñ dīda-o-dil ulajh ga.e

soz-e-yaqīñ ke saath saath lazzat-e-kāfrī bhī dī

māhir'-e-dil-fagār par aap kī ye navāzisheñ

fitrat-e-āshiqī bhī dī daulat-e-shā.irī bhī dī

fursat-e-aghi bhi di lazzat-e-be-KHudi bhi di

maut ke sath sath hi aap ne zindagi bhi di

soz-e-darun ata kiya jurat-e-ashiqi bhi di

un ki nigah-e-naz ne gham hi nahin KHushi bhi di

us ne niyaz-o-naz ke saya-e-warq ulaT diye

dast-e-KHalil bhi diya sanat-e-azri bhi di

phir bhi meri nigah mein dunon jahan siyah nahin

meri shab-e-firaq ko chand ne raushni bhi di

aap ne ek nigah mein sab ko nihaal kar diya

phul ko muskurahaTen mauj ko be-kali bhi di

chhin lo mujh se dosto taqat-e-'arz-e-muddaa

us ne mizaj-e-yar ko dawat-e-barhami bhi di

dam-e-tayyunat mein dida-o-dil ulajh gae

soz-e-yaqin ke sath sath lazzat-e-kafri bhi di

mahir'-e-dil-fagar par aap ki ye nawazishen

fitrat-e-ashiqi bhi di daulat-e-shairi bhi di