bimar-e-shab-e-gham ki allah re tawanai

bīmār-e-shab-e-ġham kī allāh re tavānā.ī

ik huuk uThī dil se aur arsh ko chhū aa.ī

kuchh tujh ko ḳhabar bhī hai au mahv-e-ḳhud-ārā.ī

āñKheñ hī nahīñ tanhā dil bhī tamāshā.ī

har chiiz mohabbat meñ be-tāb nazar aa.ī

titlī bhī āvāra shabnam bhī hai harjā.ī

jab uTh na sakā us se jor-e-ġham-e-tanhā.ī

bū phuul ke siina se ghabrā ke nikal aa.ī

is ishq-o-mohabbat ke dastūr ko kyā kahiye

jiinā bhī rusvā.ī marnā bhī hai rusvā.ī

kyā zulam hai ye duniyā qātil use kahtī hai

jo maut ke parde meñ karatā hai masīhā.ī

Duubī huī nabzeñ kyuuñ ubhrī chalī aatī haiñ

ik bhūlne vaale ko shāyad mirī yaad aa.ī

saaqī kī nigāhoñ kā andāz are tauba

mai jaam meñ letī hai añgḌā.ī pe añgḌā.ī

'māhir' mujhe matlab kyā ehsās-e-masarrat se

aane ko mire lab par sau baar hañsī aa.ī

bimar-e-shab-e-gham ki allah re tawanai

ek huk uThi dil se aur arsh ko chhu aai

kuchh tujh ko KHabar bhi hai au mahw-e-KHud-arai

aanKhen hi nahin tanha dil bhi tamashai

har chiz mohabbat mein be-tab nazar aai

titli bhi aawara shabnam bhi hai harjai

jab uTh na saka us se jor-e-gham-e-tanhai

bu phul ke sina se ghabra ke nikal aai

is ishq-o-mohabbat ke dastur ko kya kahiye

jina bhi ruswai marna bhi hai ruswai

kya zulam hai ye duniya qatil use kahti hai

jo maut ke parde mein karata hai masihai

Dubi hui nabzen kyun ubhri chali aati hain

ek bhulne wale ko shayad meri yaad aai

saqi ki nigahon ka andaz are tauba

mai jam mein leti hai angDai pe angDai

'mahir' mujhe matlab kya ehsas-e-masarrat se

aane ko mere lab par sau bar hansi aai