wo raaten yaad aati hai wo raaten yaad aati hai

vo rāteñ jo ki thī mauzūñ ulfat kī kahānī kā

vo rāteñ jin pe saaya thā nishāt-o-shādmānī kā

vo rāteñ jin pe dhokā thā hasīnoñ kī javānī kā

vo rāteñ jin ko kah sakte haiñ hāsil zindagānī kā

vo rāteñ yaad aatī hai vo rāteñ yaad aatī hai

vo rāteñ jin ko mere shauq-e-behad ne ubhārā thā

vo rāteñ jin meñ un kā jaur pinhā bhī gavārā thā

vo rāteñ jin ke pech-o-ḳham meñ ummīdoñ kā daarā thā

vo rāteñ jin ko un kī muskurāhaT ne sañvārā thā

vo rāteñ yaad aatī hai vo rāteñ yaad aatī hai

vo kuchh betābiyāñ sī jalva gar zulf pareshāñ par

ki jo baarī hai merī saikḌoñ shab.hā-e-hijrāñ par

navāzish.hā-e-be-pāyāñ par merī duniyā-e-vīrāñ par

vo un kā muskurā kar jhūmnā sub.h-e-bahārāñ par

vo rāteñ yaad aatī hai vo rāteñ yaad aatī hai

havā phūloñ ko chhū kar aa rahī thī marġh-zāroñ se

vo un kī tābisheñ 'āriz kā Takrānā sitāroñ se

vo un kā gungunā kar khelnā phūloñ ke hāroñ se

vo mere she'r par tanqīd farmānā ishāroñ se

vo rāteñ yaad aatī hai vo rāteñ yaad aatī hai

havā.eñ sansanātī thī sitāre jagmagāte the

vo paiham gungunāte the musalsal muskurāte the

vo mujh ko mast-mast āñkhoñ se paimāne pilāte the

nigāhoñ ko merī ādāb-e-mai-e-noshī sikhāte the

vo rāteñ yaad aatī hai vo rāteñ yaad aatī hai

wo raaten jo ki thi mauzun ulfat ki kahani ka

wo raaten jin pe saya tha nishat-o-shadmani ka

wo raaten jin pe dhoka tha hasinon ki jawani ka

wo raaten jin ko kah sakte hain hasil zindagani ka

wo raaten yaad aati hai wo raaten yaad aati hai

wo raaten jin ko mere shauq-e-behad ne ubhaara tha

wo raaten jin mein un ka jaur pinha bhi gawara tha

wo raaten jin ke pech-o-KHam mein ummidon ka dara tha

wo raaten jin ko un ki muskurahaT ne sanwara tha

wo raaten yaad aatī hai wo raaten yaad aatī hai

wo kuchh betabiyan si jalwa gar zulf pareshan par

ki jo bari hai meri saikDon shabha-e-hijran par

nawazishha-e-be-payan par meri duniya-e-viran par

wo un ka muskura kar jhumna subh-e-bahaaran par

wo raaten yaad aati hai wo raaten yaad aati hai

hawa phulon ko chhu kar aa rahi thi margh-zaron se

wo un ki tabishen 'ariz ka Takrana sitaron se

wo un ka gunguna kar khelna phulon ke haaron se

wo mere she'r par tanqid farmana ishaaron se

wo raaten yaad aati hai wo raaten yaad aati hai

hawaen sansanati thi sitare jagmagate the

wo paiham gungunate the musalsal muskuraate the

wo mujh ko mast-mast aankhon se paimane pilate the

nigahon ko meri aadab-e-mai-e-noshi sikhate the

wo raaten yaad aati hai wo raaten yaad aati hai