mere dil ki har ek rag KHun-chakan malum hoti hai

mire dil kī har ik rag ḳhūñ-chakāñ ma.alūm hotī hai

tamannāoñ kī duniyā gulistāñ ma.alūm hotī hai

qiyāmat aa na jaa.e raat ke au jāgne vaale

tirī har saañs labrez-e-fuġhāñ ma.alūm hotī hai

bhaḌak ai sham'-e-kushta aur nigāh-e-justujū ban jā

mirī turbat kisī ko be-nishāñ ma.alūm hotī hai

fuġhāñ TuuTe hue dil kī jise tum khel samjhe ho

mujhe vābasta-e-nazm-e-jahāñ ma.alūm hotī hai

jo sun lete to kyā thā muḳhtasar sī sharh-e-barbādī

magar tum ko to vo ik dāstāñ ma.alūm hotī hai

mirī mayyat pe vo merī vafā.eñ yaad karte haiñ

ḳhamoshī bhī mirī jādū-bayāñ ma.alūm hotī hai

tabassum-rez haiñ kaliyāñ kHayābān-e-fasāhat kī

zamīn-e-she'r 'māhir' gul-fashāñ ma.alūm hotī hai

mere dil ki har ek rag KHun-chakan malum hoti hai

tamannaon ki duniya gulistan malum hoti hai

qiyamat aa na jae raat ke au jagne wale

teri har sans labrez-e-fughan malum hoti hai

bhaDak ai sham'-e-kushta aur nigah-e-justuju ban ja

meri turbat kisi ko be-nishan malum hoti hai

fughan TuTe hue dil ki jise tum khel samjhe ho

mujhe wabasta-e-nazm-e-jahan malum hoti hai

jo sun lete to kya tha muKHtasar si sharh-e-barbaadi

magar tum ko to wo ek dastan malum hoti hai

meri mayyat pe wo meri wafaen yaad karte hain

KHamoshi bhi meri jadu-bayan malum hoti hai

tabassum-rez hain kaliyan kHayaban-e-fasahat ki

zamin-e-she'r 'mahir' gul-fashan malum hoti hai