dekhna ye kaun be-parda numayan ho gaya

dekhnā ye kaun be-parda numāyāñ ho gayā

ek ā'lam-e-be-niyāz kufr-o-īmāñ ho gayā

aaj apne kibr par zāhid pashemāñ ho gayā

zohd ne itnī taraqqī kī ki isyāñ ho gayā

us kī bargashta nasībī par kahāñ tak roiye

vo gulistāñ jo bahār aate hī vīrāñ ho gayā

rahm kar ai muzda-e-vahm-e-musarrat rahm kar

dekhtā huuñ ġham kā shīrāza pareshāñ ho gayā

phir koī niklā hai ghar se le ke duniyā-e-shabāb

phir kisī kam-baḳht ke miTne kā sāmāñ ho gayā

khul hī jaatā ek din terī masīhā.ī kā raaz

vo to ye kahiye ki ġham kā naam darmāñ ho gayā

bahr-e-vahdat se uThī thī ek be-tābāna mauj

ālam-e-kasrat meñ jis kā naam insāñ ho gayā

Thokaroñ hī Thokaroñ meñ pā ga.e manzil ko ham

mushkiloñ hī mushkiloñ meñ kaam āsāñ ho gayā

aaj kuchh is dhun meñ chheḌā maiñ ne 'māhir' sāz-e-ishq

zarra-zarra kāk-e-hastī kā ġhazal-ḳhvāñ ho gayā

dekhna ye kaun be-parda numayan ho gaya

ek aa'lam-e-be-niyaz kufr-o-iman ho gaya

aaj apne kibr par zahid pasheman ho gaya

zohd ne itni taraqqi ki ki isyan ho gaya

us ki bargashta nasibi par kahan tak roiye

wo gulistan jo bahaar aate hi viran ho gaya

rahm kar ai muzda-e-wahm-e-musarrat rahm kar

dekhta hun gham ka shiraaza pareshan ho gaya

phir koi nikla hai ghar se le ke duniya-e-shabab

phir kisi kam-baKHt ke miTne ka saman ho gaya

khul hi jata ek din teri masihai ka raaz

wo to ye kahiye ki gham ka nam darman ho gaya

bahr-e-wahdat se uThi thi ek be-tabana mauj

aalam-e-kasrat mein jis ka nam insan ho gaya

Thokaron hi Thokaron mein pa gae manzil ko hum

mushkilon hi mushkilon mein kaam aasan ho gaya

aaj kuchh is dhun mein chheDa main ne 'mahir' saz-e-ishq

zarra-zarra kak-e-hasti ka ghazal-KHwan ho gaya