tumhaare husn ke aaina-dar ho ke rahe

tumhāre husn ke ā.īna-dār ho ke rahe

nazar meñ phuul sarāpā bahār ho ke rahe

guloñ meñ māya-e-sad-iftiḳhār ho ke rahe

chaman-chaman meñ vo jān-e-bahār ho ke rahe

'ajīb ā.īna-ḳhāna se 'ālam-e-kasrat

jo ḳhud ko ek the kahte hazār ho ke rahe

Thahr ke dekh uchaTtī nazar se kyā hāsil

vo terā mārkā siine ke paar ho ke rahe

rahe bhī 'ālam-e-kasrat meñ is tarah to kyā

jab apnī ārzuoñ kā mazār ho ke rahe

lagī vo choT kaleja meñ yaad se un kī

hazār zabt kiyā be-qarār ho ke rahe

kHushī-e-vasl thī tamhīd kulfat-e-furqat

surūr raat ke din ko ḳhumār ho ke rahe

qarīb-e-dahr kī rañgīniyāñ ma’āz-allāh

halāk jalva-e-nā-pā.edār ho ke rahe

na pūchho un se judā ho ke kis tarah guzrī

qarār le ke ga.e be-qarār ho ke rahe

qarār se kahīñ rahne diyā na dil ne hameñ

dayār meñ bhī ġharīb-ud-dayār ho ke rahe

nazar milā ke vo karte haiñ is adā se kalām

ki jhuuT baat kā bhī e'tibār ho ke rahe

'abas hijāb hai parde kī aaḌ meñ 'mahmūd'

kabhī bhī jalva-e-ruḳhsār-e-yār ho ke rahe

tumhaare husn ke aaina-dar ho ke rahe

nazar mein phul sarapa bahaar ho ke rahe

gulon mein maya-e-sad-iftiKHar ho ke rahe

chaman-chaman mein wo jaan-e-bahaar ho ke rahe

'ajib aaina-KHana se 'alam-e-kasrat

jo KHud ko ek the kahte hazar ho ke rahe

Thahr ke dekh uchaTti nazar se kya hasil

wo tera marka sine ke par ho ke rahe

rahe bhi 'alam-e-kasrat mein is tarah to kya

jab apni aarzuon ka mazar ho ke rahe

lagi wo choT kaleja mein yaad se un ki

hazar zabt kiya be-qarar ho ke rahe

kHushi-e-wasl thi tamhid kulfat-e-furqat

surur raat ke din ko KHumar ho ke rahe

qarib-e-dahr ki ranginiyan ma’az-allah

halak jalwa-e-na-paedar ho ke rahe

na puchho un se juda ho ke kis tarah guzri

qarar le ke gae be-qarar ho ke rahe

qarar se kahin rahne diya na dil ne hamein

dayar mein bhi gharib-ud-dayar ho ke rahe

nazar mila ke wo karte hain is ada se kalam

ki jhuT baat ka bhi e'tibar ho ke rahe

'abas hijab hai parde ki aaD mein 'mahmud'

kabhi bhi jalwa-e-ruKHsar-e-yar ho ke rahe