main kahan tha haif paDa hua kahan la ke mujhko biTha diya

maiñ kahāñ thā haif paḌā huā kahāñ lā ke mujh ko biThā diyā

yahī dostī kā milā sila ki jahāñ kā jhagḌā lagā diyā

huā milne kā jo us se jo hausla rahā muddatoñ vo judā-judā

jo milā to mil ke ye kyā kiyā hameñ ḳhaak hī meñ milā diyā

abhī tum bhī the abhī dost bhī abhī apne bhī the parā.e bhī

tirī yaad ne ye ġhazab kiyā ki tamām qissa bhulā diyā

use maiñ fanā ki baqā kahūñ nahīñ baat kahne kī kyā kahūñ

ye 'ajab rāz-o-niyāz hai ki banā ke us se miTā diyā

vo jahāñ kī sham.a hai aur hī ki baġhair sub.h na gul huī

maiñ vo bad-nasīb charāġh huuñ ki jalā diyā aur bujhā diyā

jise log samjhe haiñ 'chāñd' hai vo kisī kī ruḳh kī naqāb hai

liyā kaam jis ne nigāh se use parda meñ jalva dikhā diyā

na banānā thā na banātā to ye banā ke 'chāñd' ko kyā kiyā

kiyā nūr-e-pāk se jalva-gar magar us meñ daaġh lagā diyā

main kahan tha haif paDa hua kahan la ke mujh ko biTha diya

yahi dosti ka mila sila ki jahan ka jhagDa laga diya

hua milne ka jo us se jo hausla raha muddaton wo juda-juda

jo mila to mil ke ye kya kiya hamein KHak hi mein mila diya

abhi tum bhi the abhi dost bhi abhi apne bhi the parae bhi

teri yaad ne ye ghazab kiya ki tamam qissa bhula diya

use main fana ki baqa kahun nahin baat kahne ki kya kahun

ye 'ajab raaz-o-niyaz hai ki bana ke us se miTa diya

wo jahan ki shama hai aur hi ki baghair subh na gul hui

main wo bad-nasib charagh hun ki jala diya aur bujha diya

jise log samjhe hain 'chand' hai wo kisi ki ruKH ki naqab hai

liya kaam jis ne nigah se use parda mein jalwa dikha diya

na banana tha na banata to ye bana ke 'chand' ko kya kiya

kiya nur-e-pak se jalwa-gar magar us mein dagh laga diya