main KHud ko DhunDhta hun wo hath aa rahe hain

maiñ ḳhud ko DhūñDhtā huuñ vo haath aa rahe haiñ

ab merī shakl se vo jalva dikhā rahe haiñ

maiñ vo nahīñ huuñ hargiz vo meñ nahīñ haiñ lekin

vo mujh ko mahv karke ḳhud ko batā rahe haiñ

maiñ un kā ā.īna huuñ vo merā ā.īna haiñ

maiñ unheñ dikhā rahā huuñ vo mujhe dikhā rahe haiñ

rahtā huuñ un ke man meñ vo mere man ke man haiñ

ab to vahī sarāpā mujh meñ samā rahe haiñ

maiñ maiñ nahīñ rahā ab ab vo hī maiñ bane haiñ

har aan ab vo mujh meñ maiñ ban ke aa rahe haiñ

ai vaah hazrat-e-ishq achchhe haiñ ye karishme

jitnā mujhe bigāḌā utnā banā rahe haiñ

saaqī ke haath se ham pī kar sharāb-e-vahdat

kuchh aur ban rahe haiñ apne se jā rahe haiñ

mai meñ kahāñ thī mastī itnī ki mujh ko khotī

un āñkhoñ ke maiñ sadqe be-ḳhud banā rahe haiñ

tālib se lan-tarānī un kī chalī na āḳhir

kah kar valakin-un-zur par dah uThā rahe haiñ

maiñ kyā batā.ūñ 'ġhausī' maiñ kaisā miT gayā huuñ

ḳhud ko TaToltā huuñ vo haath aa rahe haiñ

main KHud ko DhunDhta hun wo hath aa rahe hain

ab meri shakl se wo jalwa dikha rahe hain

main wo nahin hun hargiz wo mein nahin hain lekin

wo mujh ko mahw karke KHud ko bata rahe hain

main un ka aaina hun wo mera aaina hain

main unhen dikha raha hun wo mujhe dikha rahe hain

rahta hun un ke man mein wo mere man ke man hain

ab to wahi sarapa mujh mein sama rahe hain

main main nahin raha ab ab wo hi main bane hain

har aan ab wo mujh mein main ban ke aa rahe hain

ai wah hazrat-e-ishq achchhe hain ye karishme

jitna mujhe bigaDa utna bana rahe hain

saqi ke hath se hum pi kar sharab-e-wahdat

kuchh aur ban rahe hain apne se ja rahe hain

mai mein kahan thi masti itni ki mujh ko khoti

un aankhon ke main sadqe be-KHud bana rahe hain

talib se lan-tarani un ki chali na aaKHir

kah kar walakin-un-zur par dah uTha rahe hain

main kya bataun 'ghausi' main kaisa miT gaya hun

KHud ko TaTolta hun wo hath aa rahe hain