na hadis mai ki talash hai na gharaz hikayat-e-jam se

na hadīs mai kī talāsh hai na ġharaz hikāyat-e-jām se

terī ik nazar ne bacha liyā mujhe gumrahī ke maqām se

hai isī kā naam to zindagī na.e sānehe na.e hādse

vo qafas-nasīb qafas meñ hai jo chhuTe the halqa daam se

tū nizām-e-bazm-e-hayāt hai terī zaat jumla sifāt hai

yahī kah rahe haiñ ḳhavās bhī yahī sun rahā huuñ ’avām se

ye merī samajh kā futūr hai ye merī nazar kā qusūr hai

vahī jashn hai vahī nuur hai jo 'ayāñ hai maah tamām se

maiñ abhī maqām-e-fanāñ meñ huuñ merī maut hai merī zindagī

maiñ pahuñch rahā huuñ maqām tak maiñ guzar rahā huuñ maqām se

kahāñ vo jamāl-e-jahāñ-numā kahāñ ek zarra-e-be-basar

use kaun nūr-e-sahar kahe na chhupe jo zulmat-e-shām se

tirā 'ishq hī merā rahnumā tirā 'ishq hī merā peshvā

kisī muqtadī kī nazar huuñ maiñ jo laḌī huī hai imaam se

koī ḳhum ke ḳhum piye hue koī ek jaam kā muntazar

tire riñd phir bhī haiñ mutma.in tere mai-kade ke nizām se

na hadis mai ki talash hai na gharaz hikayat-e-jam se

teri ek nazar ne bacha liya mujhe gumrahi ke maqam se

hai isi ka nam to zindagi nae sanehe nae hadse

wo qafas-nasib qafas mein hai jo chhuTe the halqa dam se

tu nizam-e-bazm-e-hayat hai teri zat jumla sifat hai

yahi kah rahe hain KHawas bhi yahi sun raha hun ’awam se

ye meri samajh ka futur hai ye meri nazar ka qusur hai

wahi jashn hai wahi nur hai jo 'ayan hai mah tamam se

main abhi maqam-e-fanan mein hun meri maut hai meri zindagi

main pahunch raha hun maqam tak main guzar raha hun maqam se

kahan wo jamal-e-jahan-numa kahan ek zarra-e-be-basar

use kaun nur-e-sahar kahe na chhupe jo zulmat-e-sham se

tera 'ishq hi mera rahnuma tera 'ishq hi mera peshwa

kisi muqtadi ki nazar hun main jo laDi hui hai imam se

koi KHum ke KHum piye hue koi ek jam ka muntazar

tere rind phir bhi hain mutmain tere mai-kade ke nizam se