bazm hai saqi hai mai hai gardish-e-paimana hai

bazm hai saaqī hai mai hai gardish-e-paimāna hai

ab kahāñ mastoñ ko hosh kā'ba-o-but-ḳhāna hai

jis ko dekho mast hai mad.hosh hai dīvāna hai

har nazar ai jān-e-jāñ terī tajallī-ḳhāna hai

sad mubārak ho gayā dil jalva-gāh-e-nāz meñ

'aks jab se aañkh meñ husn-e-ruḳh-e-jānāna hai

sabr sadqe hosh qurbāñ dil huā us par nisār

madh-bharī āñkheñ haiñ jis kī har adā mastāna hai

ġham nahīñ duniyā agarche us ko dīvāna kahe

hai vahī hushiyār be-shak jo tirā dīvāna hai

kar nahīñ saktā masīhā kuchh mire dil kā 'ilāj

dard kā daarū faqat ai jaañ tirā paimāna hai

kis kī jānib ruḳh ho apnā ho kahāñ sajda adā

tū mirā qibla hai jab ka.aba tirā kāshāna hai

jin ke saaqī mai-parasto haiñ huzūr-e-‘ārifī’

bul-'ulā.ī jaam hai vo qādrī mai-ḳhāna hai

bil-yaqīñ sarkār meñ 'manzūr' hai 'manzūr' tū

terā mashrab ham-navā-e-mashrab-e-rindāna hai

bazm hai saqi hai mai hai gardish-e-paimana hai

ab kahan maston ko hosh ka'ba-o-but-KHana hai

jis ko dekho mast hai madhosh hai diwana hai

har nazar ai jaan-e-jaan teri tajalli-KHana hai

sad mubarak ho gaya dil jalwa-gah-e-naz mein

'aks jab se aankh mein husn-e-ruKH-e-jaanana hai

sabr sadqe hosh qurban dil hua us par nisar

madh-bhari aankhen hain jis ki har ada mastana hai

gham nahin duniya agarche us ko diwana kahe

hai wahi hushiyar be-shak jo tera diwana hai

kar nahin sakta masiha kuchh mere dil ka 'ilaj

dard ka daru faqat ai jaan tera paimana hai

kis ki jaanib ruKH ho apna ho kahan sajda ada

tu mera qibla hai jab kaba tera kashana hai

jin ke saqi mai-parasto hain huzur-e-‘arifi’

bul-'ulai jam hai wo qadri mai-KHana hai

bil-yaqin sarkar mein 'manzur' hai 'manzur' tu

tera mashrab ham-nawa-e-mashrab-e-rindana hai