munh se nikla tha ki tark-e-mudda’a hota nahin

muñh se niklā thā ki tark-e-mudda’ā hotā nahīñ

khīñch kar ḳhanjar vo bole kyā kahā hotā nahīñ

mā’nī-e-lafz-e-anal-haq haq sahī lekin fuzūl

banda banda hai kabhī banda ḳhudā hotā nahīñ

Thaan kar aayā thā dil meñ shikva-e-furqat magar

is bharī mahfil meñ mujh se ab gila hotā nahīñ

jalne vaale ḳhud jale jaate haiñ apnī aag meñ

jī na chāhe tum se zulm-e-nā-ravā hotā nahīñ

o kaTīlī āñkhoñ vaalī pheñk ḳhanjar haath se

kyā in āñkhoñ se tirā matlab adā hotā nahīñ

'ishq meñ hotā hai vahshat bhī ḳhushī bhī rañj bhī

dil hai pahlū meñ salāmat phir to kyā hotā nahīñ

manzil-e-maqsūd bhī 'āshiq se kartī hai gurez

‘mast’ jab tak 'ishq meñ fazl-e-kHudā hotā nahīñ

munh se nikla tha ki tark-e-mudda’a hota nahin

khinch kar KHanjar wo bole kya kaha hota nahin

ma’ni-e-lafz-e-anal-haq haq sahi lekin fuzul

banda banda hai kabhi banda KHuda hota nahin

Than kar aaya tha dil mein shikwa-e-furqat magar

is bhari mahfil mein mujh se ab gila hota nahin

jalne wale KHud jale jate hain apni aag mein

ji na chahe tum se zulm-e-na-rawa hota nahin

o kaTili aankhon wali phenk KHanjar hath se

kya in aankhon se tera matlab ada hota nahin

'ishq mein hota hai wahshat bhi KHushi bhi ranj bhi

dil hai pahlu mein salamat phir to kya hota nahin

manzil-e-maqsud bhi 'ashiq se karti hai gurez

‘mast’ jab tak 'ishq mein fazl-e-kHuda hota nahin