اے جان جہاں کب تک یہ گوشۂ تنہائی

اے جان جہاں کب تک یہ گوشۂ تنہائی

سب دید کے طالب ہیں جتنے ہیں تماشائی

آئینہ کہے گا کیا کیا تجھ میں ہے رعنائی

پوچھ اس سے تری قیمت تیرا جو ہے شیدائی

میں غیر نہیں اے جاں کیوں ہوتے ہو تم انجاں

مجھ سے تو ہمیشہ سے ہے ربط و شناسائی

پردے میں نمایاں ہے بے پردہ وہ پنہاں ہے

پیدائی ہے پنہانی پنہانی سے پیدائی

اس شوقِ تماشا نے اس کو بھی کہاں چھوڑے

پردہ سے نکل آیا خود بن کے تماشائی

بربادئ عاشق سے کب رہتی ہے معشوقی

سب دم سے ہمارے ہے معشوقی و شیدائی

وہ باندھ کے بیٹھا ہے دامن ترے دامن سے

دیوانہ پہ قربان ہے داناؤں کی دانائی

مدہوشی الفت میں کس لطف سے کٹتی تھی

کیوں ہوش ہمیں آیا کیوں عقل یہ پھر آئی

رندی مرا مذہب ہے مستی مرا مشرب ہے

ہوں حسرتِؔ دیوانہ اور آپ کا شیدائی