ai jaan-e-jahan kab tak ye gosha-e-tanhai

ai jān-e-jahāñ kab tak ye gosha-e-tanhā.ī

sab diid ke tālib haiñ jitne haiñ tamāshā.ī

ā.īna kahegā kyā kyā tujh meñ hai rā'nā.ī

pūchh us se tirī qīmat terā jo hai shaidā.ī

maiñ ġhair nahīñ ai jaañ kyuuñ hote ho tum anjāñ

mujh se to hamesha se hai rabt-o-shanāsā.ī

parde meñ numāyāñ hai be-parda vo pinhāñ hai

paidā.ī hai pinhānī pinhānī hai paidā.ī

us shauq-e-tamāshā ne us ko bhī kahāñ chhoḌā

parda se nikal aayā ḳhud ban ke tamāshā.ī

barbādī-e-'āshiq se kab rahtī hai mā'shūqī

sab dam se hamāre hai mā'shūqī-o-shaidā.ī

vo bāñdh ke baiThā hai dāman tire dāman se

dīvāna pe qurbān hai dānāoñ kī dānā.ī

mad-hoshī-e-ulfat meñ kis lutf se kaTtī thī

kyuuñ hosh hameñ aayā kyuuñ 'aql ye phir aa.ī

rindī mirā maz.hab hai mastī mirā mashrab hai

huuñ ‘hasrat’-e-dīvāna aur aap kā shaidā.ī

ai jaan-e-jahan kab tak ye gosha-e-tanhai

sab did ke talib hain jitne hain tamashai

aaina kahega kya kya tujh mein hai ra'nai

puchh us se teri qimat tera jo hai shaidai

main ghair nahin ai jaan kyun hote ho tum anjaan

mujh se to hamesha se hai rabt-o-shanasai

parde mein numayan hai be-parda wo pinhan hai

paidai hai pinhani pinhani hai paidai

us shauq-e-tamasha ne us ko bhi kahan chhoDa

parda se nikal aaya KHud ban ke tamashai

barbaadi-e-'ashiq se kab rahti hai ma'shuqi

sab dam se hamare hai ma'shuqi-o-shaidai

wo bandh ke baiTha hai daman tere daman se

diwana pe qurban hai danaon ki danai

mad-hoshi-e-ulfat mein kis lutf se kaTti thi

kyun hosh hamein aaya kyun 'aql ye phir aai

rindi mera mazhab hai masti mera mashrab hai

hun ‘hasrat’-e-diwana aur aap ka shaidai