ab to saba chaman se aati nahin idhar kuchh

ab to sabā chaman se aatī nahīñ idhar kuchh

ham tak nahīñ pahuñchtī gul kī ḳhabar itr kuchh

zauq-e-ḳhabar meñ ham to behosh ho ga.e the

kyā jaane kab vo aayā ham ko nahīñ ḳhabar kuchh

ye tasht-o-teġh hai ab ye maiñ huuñ aur ye tū

hai saath mere zālim da.ava tujhe agar kuchh

ve din ga.e ki be-ġham koī ghaḌī kaTī thī

thamte nahīñ haiñ aañsū ab to pahar pahar kuchh

un ujḌī bastiyoñ meñ dīvār-o-dar haiñ kyā kyā

āsār jin ke haiñ ye un kā nahīñ asar kuchh

vaa.iz na ho muāriz nek-o-bad jahāñ se

jo ho sake to ġhāfil apnā hī fikr kar kuchh

āñkhoñ meñ merī a.alam saarā siyāh hai ab

mujh ko baġhair us ke aatā nahīñ nazar kuchh

ham ne to nāḳhunoñ se muñh saarā noch Daalā

ab kohkan dikhāve rakhtā hai gar hunar kuchh

talvār ke tale hī kaaTī hai umr saarī

abrū-e-ḳham se us ke ham ko nahīñ hai Dar kuchh

gah shefta haiñ mū ke gah bāvle haiñ rū ke

ahvāl-e-'mīr' jī kā hai shaam kuchh sahar kuchh

ab to saba chaman se aati nahin idhar kuchh

hum tak nahin pahunchti gul ki KHabar itr kuchh

zauq-e-KHabar mein hum to behosh ho gae the

kya jaane kab wo aaya hum ko nahin KHabar kuchh

ye tasht-o-tegh hai ab ye main hun aur ye tu

hai sath mere zalim dawa tujhe agar kuchh

we din gae ki be-gham koi ghaDi kaTi thi

thamte nahin hain aansu ab to pahar pahar kuchh

un ujDi bastiyon mein diwar-o-dar hain kya kya

aasar jin ke hain ye un ka nahin asar kuchh

waiz na ho muariz nek-o-bad jahan se

jo ho sake to ghafil apna hi fikr kar kuchh

aankhon mein meri aalam sara siyah hai ab

mujh ko baghair us ke aata nahin nazar kuchh

hum ne to naKHunon se munh sara noch Dala

ab kohkan dikhawe rakhta hai gar hunar kuchh

talwar ke tale hi kaTi hai umr sari

abru-e-KHam se us ke hum ko nahin hai Dar kuchh

gah shefta hain mu ke gah bawle hain ru ke

ahwal-e-'mir' ji ka hai sham kuchh sahar kuchh