اب تو صبا چمن سے آتی نہیں ادھر کچھ

اب تو صبا چمن سے آتی نہیں ادھر کچھ

ہم تک نہیں پہنچتی گل کی خبر عطر کچھ

ذوق خبر میں ہم تو بے ہوش ہو گئے تھے

کیا جانے کب وہ آیا ہم کو نہیں خبر کچھ

یہ طشت و تیغ ہے اب یہ میں ہوں اور یہ تو

ہے ساتھ میرے ظالم دعوی تجھے اگر کچھ

وے دن گئے کہ بے غم کوئی گھڑی کٹی تھی

تھمتے نہیں ہیں آنسو اب تو پہر پہر کچھ

ان اجڑی بستیوں میں دیوار و در ہیں کیا کیا

آثار جن کے ہیں یہ ان کا نہیں اثر کچھ

واعظ نہ ہو معارض نیک و بد جہاں سے

جو ہو سکے تو غافل اپنا ہی فکر کر کچھ

آنکھوں میں میری عالم سارا سیاہ ہے اب

مجھ کو بغیر اس کے آتا نہیں نظر کچھ

ہم نے تو ناخنوں سے منہ سارا نوچ ڈالا

اب کوہ کن دکھاوے رکھتا ہے گر ہنر کچھ

تلوار کے تلے ہی کاٹی ہے عمر ساری

ابروے خم سے اس کے ہم کو نہیں ہے ڈر کچھ

گہہ شیفتہ ہیں مو کے گہہ باؤلے ہیں رو کے

احوال میرؔ جی کا ہے شام کچھ سحر کچھ