mera pir mujhko KHarid kar mujhe qaid-o-band se chhuDa diya

merā piir mujh ko ḳharīd kar mujhe qaid-o-band se chhuḌā diyā

maiñ parind-e-be-par-o-bāl thā mujhe par lagā ke uḌā diyā

vo namāz kaisī namāz thī jo ḳhudā adā kiyā 'arsh par

hai baḌā karam mere piir kā vo namāz paḌhnā sikhā diyā

terā raaz maiñ merā raaz tū nahīñ ab mujhe koī justujū

dil-e-muztarib huā mutma.in chhupā raaz jo thā batā diyā

shab-o-roz piir kī diid hai shab-o-roz rindoñ kī 'iid hai

merā piir 'iid kā chāñd hai mujhe dīd-bāzī sikhā diyā

mere tan meñ dil mere dil meñ jaañ merī jaañ meñ kaun hai kyā kahūñ

ka.ī parde vahm-o-gumāñ ke the vo uThā ke gūñgā banā diyā

kahīñ maiñ-o-tū kahīñ hā-o-hū kahīñ lā-o-illā ke naqsh the

merā dil banā diyā ā.īna vo saare nuqūsh miTā diyā

dar-e-pīr hai dar-e-mustafā dar-e-mustafa hai dar-e-ḳhudā

mujhe dair-o-kā'ba se kyā ġharaz usī dar pe sar ko jhukā diyā

merā rahnumā bhī 'ajīb hai ye to 'rizvāñ' apnā nasīb hai

jo na sun sakā vo sunā diyā jo na dikh sakā vo dikhā diyā

mera pir mujh ko KHarid kar mujhe qaid-o-band se chhuDa diya

main parind-e-be-par-o-baal tha mujhe par laga ke uDa diya

wo namaz kaisi namaz thi jo KHuda ada kiya 'arsh par

hai baDa karam mere pir ka wo namaz paDhna sikha diya

tera raaz main mera raaz tu nahin ab mujhe koi justuju

dil-e-muztarib hua mutmain chhupa raaz jo tha bata diya

shab-o-roz pir ki did hai shab-o-roz rindon ki 'id hai

mera pir 'id ka chand hai mujhe did-bazi sikha diya

mere tan mein dil mere dil mein jaan meri jaan mein kaun hai kya kahun

kai parde wahm-o-guman ke the wo uTha ke gunga bana diya

kahin main-o-tu kahin ha-o-hu kahin la-o-illa ke naqsh the

mera dil bana diya aaina wo sare nuqush miTa diya

dar-e-pir hai dar-e-mustafa dar-e-mustafa hai dar-e-KHuda

mujhe dair-o-ka'ba se kya gharaz usi dar pe sar ko jhuka diya

mera rahnuma bhi 'ajib hai ye to 'rizwan' apna nasib hai

jo na sun saka wo suna diya jo na dikh saka wo dikha diya