meri aarzu mera muddaa koi aur is ke siwa nahin

mirī aarzū mirā mudda.ā koī aur is ke sivā nahīñ

ġham-e-yār hai to jahān hai mujhe kyā kamī mujhe kyā nahīñ

tirī be-niyāzī kā fitna-gar mujhe tujh se koī gila nahīñ

tū hazār baar judā rahe tirī yaad dil se judā nahīñ

ye kahāñ kā rog hai kyā kahūñ mire dil ko chain zarā nahīñ

vo mileñ to koī maraz nahīñ na mileñ to koī davā nahīñ

nahīñ farq zāt-o-sifāt meñ ki sifāt jam.a haiñ zaat meñ

maiñ kahīñ bhī us se alag nahīñ vo kahīñ bhī mujh se judā nahīñ

tire haath merī fanā baqā tire haath merī sazā jaza

mujhe naaz hai ki tire sivā koī aur merā ḳhudā nahīñ

vahī unkī shoḳh-e-tajalliyāñ vahī 'kāmil' aur vahī bijliyāñ

kahe kaun kyā haiñ ye shoḳhiyāñ ki majāl-e-chūñ-o-chrā nahīñ

meri aarzu mera muddaa koi aur is ke siwa nahin

gham-e-yar hai to jahan hai mujhe kya kami mujhe kya nahin

teri be-niyazi ka fitna-gar mujhe tujh se koi gila nahin

tu hazar bar juda rahe teri yaad dil se juda nahin

ye kahan ka rog hai kya kahun mere dil ko chain zara nahin

wo milen to koi maraz nahin na milen to koi dawa nahin

nahin farq zat-o-sifat mein ki sifat jama hain zat mein

main kahin bhi us se alag nahin wo kahin bhi mujh se juda nahin

tere hath meri fana baqa tere hath meri saza jaza

mujhe naz hai ki tere siwa koi aur mera KHuda nahin

wahi unki shoKH-e-tajalliyan wahi 'kaamil' aur wahi bijliyan

kahe kaun kya hain ye shoKHiyan ki majal-e-chun-o-chra nahin