meri zindagi to firaq hai wo azal se dil mein makin sahi

mirī zindagī to firāq hai vo azal se dil meñ makīñ sahī

vo nigāh-e-shauq se duur haiñ rag-e-jāñ se laakh qarīñ sahī

hameñ jaan denī hai ek din vo kisī tarh vo kahīñ sahī

hameñ aap khīñche daar par jo nahīñ koī to hamīñ sahī

ġham-e-zindagī se farār kyā ye sukūn kyuuñ ye qarār kyā

ġham-e-zindagī bhī hai zindagī jo nahīñ ḳhushī to nahīñ sahī

sar-e-tūr ho sar-e-hashr ho hameñ intizār qubūl hai

vo kabhī mileñ vo kahīñ mileñ vo kabhī sahī vo kahīñ sahī

na ho un pe jo mirā bas nahīñ ki ye 'āshiqī hai havas nahīñ

maiñ unhīñ kā thā maiñ unhīñ kā huuñ vo mire nahīñ to nahīñ sahī

mujhe baiThne kī jagah mile mirī aarzū kā bharam rahe

tirī anjuman meñ agar nahīñ tirī anjuman ke qarīñ sahī

tire vāste hai ye vaqf-e-sar rahe tā-abad tirā sañg-e-dar

koī sajda-rez na ho sake to na ho mirī hī jabīñ sahī

mirī zindagī kā naqīb hai nahīñ duur mujh se qarīb hai

mujhe us kā ġham to nasīb hai vo agar nahīñ to nahīñ sahī

jo ho faisla vo sunā.iye use hashr par na uThā.iye

jo kareñge aap sitam vahāñ vo abhī sahī vo yahīñ sahī

use dekhne kī jo lau lagī to 'nasīr' dekh hī leñge ham

vo hazār aañkh se duur ho vo hazār parda-nashīñ sahī

meri zindagi to firaq hai wo azal se dil mein makin sahi

wo nigah-e-shauq se dur hain rag-e-jaan se lakh qarin sahi

hamein jaan deni hai ek din wo kisi tarh wo kahin sahi

hamein aap khinche dar par jo nahin koi to hamin sahi

gham-e-zindagi se farar kya ye sukun kyun ye qarar kya

gham-e-zindagi bhi hai zindagi jo nahin KHushi to nahin sahi

sar-e-tur ho sar-e-hashr ho hamein intizar qubul hai

wo kabhi milen wo kahin milen wo kabhi sahi wo kahin sahi

na ho un pe jo mera bas nahin ki ye 'ashiqi hai hawas nahin

main unhin ka tha main unhin ka hun wo mere nahin to nahin sahi

mujhe baiThne ki jagah mile meri aarzu ka bharam rahe

teri anjuman mein agar nahin teri anjuman ke qarin sahi

tere waste hai ye waqf-e-sar rahe ta-abad tera sang-e-dar

koi sajda-rez na ho sake to na ho meri hi jabin sahi

meri zindagi ka naqib hai nahin dur mujh se qarib hai

mujhe us ka gham to nasib hai wo agar nahin to nahin sahi

jo ho faisla wo sunaiye use hashr par na uThaiye

jo karenge aap sitam wahan wo abhi sahi wo yahin sahi

use dekhne ki jo lau lagi to 'nasir' dekh hi lenge hum

wo hazar aankh se dur ho wo hazar parda-nashin sahi