shakl aankhon mein meri jalwa-numa kis ki hai

shakl āñkhoñ meñ mirī jalva-numā kis kī hai

parda-e-dil se jo niklī ye sadā kis kī hai

husn kā kis ke zamāna meñ hai shohra har sū

chaar jānib jo bañdhī hai vo havā kis kī hai

nā-rasā hai jo hamesha vo hai naala kis kā

jo ki mahrūm asar hai vo du'ā kis kī hai

lo vo phir aīña-e-teġh meñ muñh dekhte haiñ

nahīñ ma.alūm ki ab aaj qazā kis kī hai

ġhash kareñ sun ke agar tuur pe bhī hoñ muusā

aisī taqdīr bhalā hosh-rubā kis kī hai

maraz-e-ishq meñ jab kaam na aayā apne

aap kā dard phir ai jaan davā kis kī hai

ye na socho ki kahāñ hai mire 'āshiq kā mazār

pahle dekho ki ye turbat tah-e-pā kis kī hai

dīda-o-dil ko maiñ duuñ husn-parastī kī sazā

ye to sābit ho ki donoñ meñ ḳhatā kis kī hai

be-ḳhudī meñ vo dar-e-yār pe kahnā merā

jo abhī kaan meñ aa.ī ye sadā kis kī hai

kis kā qāmat hai vo sadqe ho qiyāmat jis par

jaan de jis pe qazā ḳhud vo adā kis kī hai

turbat-e-qais se aatī hai ye āvāz hunūz

mere pahlū meñ jo ḳhālī hai ye jā kis kī hai

sajda karne ko dar-e-yār pe pahūñchī ai 'ashk'

aisī taqdīr zamāne meñ rasā kis kī hai

shakl aankhon mein meri jalwa-numa kis ki hai

parda-e-dil se jo nikli ye sada kis ki hai

husn ka kis ke zamana mein hai shohra har su

chaar jaanib jo bandhi hai wo hawa kis ki hai

na-rasa hai jo hamesha wo hai nala kis ka

jo ki mahrūm asar hai wo du'a kis ki hai

lo wo phir aina-e-tegh mein munh dekhte hain

nahin malum ki ab aaj qaza kis ki hai

ghash karen sun ke agar tur pe bhi hon musa

aisi taqdir bhala hosh-ruba kis ki hai

maraz-e-ishq mein jab kaam na aaya apne

aap ka dard phir ai jaan dawa kis ki hai

ye na socho ki kahan hai mere 'ashiq ka mazar

pahle dekho ki ye turbat tah-e-pa kis ki hai

dida-o-dil ko main dun husn-parasti ki saza

ye to sabit ho ki donon mein KHata kis ki hai

be-KHudi mein wo dar-e-yar pe kahna mera

jo abhi kan mein aai ye sada kis ki hai

kis ka qamat hai wo sadqe ho qiyamat jis par

jaan de jis pe qaza KHud wo ada kis ki hai

turbat-e-qais se aati hai ye aawaz hunuz

mere pahlu mein jo KHali hai ye ja kis ki hai

sajda karne ko dar-e-yar pe pahunchi ai 'ashk'

aisi taqdir zamane mein rasa kis ki hai