kal ke liye kar aaj na KHissat sharab mein

kal ke liye kar aaj na ḳhissat sharāb meñ

ye sū-e-zan hai sāqī-e-kausar ke baab meñ

haiñ aaj kyuuñ zalīl ki kal tak na thī pasand

gustāḳhī-e-farishta hamārī janāb meñ

jaañ kyuuñ nikalne lagtī hai tan se dam-e-sama.a

gar vo sadā samā.ī hai chañg-o-rubāb meñ

rū meñ hai raḳhsh-e-'umr kahāñ dekhiye thame

ne haath baag par hai na pā hai rikāb meñ

utnā hī mujh ko apnī haqīqat se bu’ad hai

jitnā ki vahm-e-ġhair se huuñ pech-o-tāb maiñ

asl-e-shuhūd-o-shāhid-o-mash.hūd ek hai

hairāñ huuñ phir mushāhida hai kis hisāb meñ

hai mushtamil numūd-e-suvar par vajūd-e-bahar

yaañ kyā dharā hai qatra-o-mauj-o-habāb meñ

sharm ik adā-e-nāz hai apne hī se sahī

haiñ kitne be-hijāb ki haiñ yuuñ hijāb meñ

ārā.ish-e-jamāl se fāriġh nahīñ hanūz

pesh-e-nazar hai ā.īna daa.im naqāb meñ

hai ġhaib-e-ġhaib jis ko samajhte haiñ ham shuhūd

haiñ ḳhvāb meñ hunūz jo jaage haiñ ḳhvāb meñ

'ġhālib' nadīm-e-dost se aatī hai bū-e-dost

mashġhūl-e-haq huuñ bandagi-e-bū-turāb meñ

kal ke liye kar aaj na KHissat sharab mein

ye su-e-zan hai saqi-e-kausar ke bab mein

hain aaj kyun zalil ki kal tak na thi pasand

gustaKHi-e-farishta hamari janab mein

jaan kyun nikalne lagti hai tan se dam-e-sama

gar wo sada samai hai chang-o-rubab mein

ru mein hai raKHsh-e-'umr kahan dekhiye thame

ne hath bag par hai na pa hai rikab mein

utna hi mujh ko apni haqiqat se bu’ad hai

jitna ki wahm-e-ghair se hun pech-o-tab main

asl-e-shuhud-o-shahid-o-mashhud ek hai

hairan hun phir mushahida hai kis hisab mein

hai mushtamil numud-e-suwar par wajud-e-bahar

yan kya dhara hai qatra-o-mauj-o-habab mein

sharm ek ada-e-naz hai apne hi se sahi

hain kitne be-hijab ki hain yun hijab mein

aaraish-e-jamal se farigh nahin hanuz

pesh-e-nazar hai aaina daim naqab mein

hai ghaib-e-ghaib jis ko samajhte hain hum shuhud

hain KHwab mein hunuz jo jage hain KHwab mein

'ghaalib' nadim-e-dost se aati hai bu-e-dost

mashghul-e-haq hun bandagi-e-bu-turab mein