gar na andoh-e-shab-e-furqat bayan ho jaega

gar na andoh-e-shab-e-furqat bayāñ ho jā.egā

be-takalluf dāġh-e-mah mohr-e-dahāñ ho jā.egā

zohra gar aisā hī shām-e-hijr meñ hotā hai aab

partav-e-mahtāb sail-e-ḳhānumāñ ho jā.egā

le to luuñ sote meñ us ke paañv kā bosa magar

aisī bātoñ se vo kāfir bad-gumāñ ho jā.egā

dil ko ham sarf-e-vafā samjhe the kyā ma.alūm thā

ya.anī ye pahle hī nazr-e-imtihāñ ho jā.egā

sab ke dil meñ hai jagah merī jo tū raazī huā

mujh pe goyā ik zamāna mehrbāñ ho jā.egā

gar nigāh-e-garm farmātī rahe ta’alīm-e-zabt

sho.ala ḳhas meñ jaise ḳhūn-e-rag meñ nihāñ ho jā.egā

baaġh meñ mujh ko na le jā varna mere haal par

har gul-e-tar ek chashm-e-ḳhūñ-fishāñ ho jā.egā

vaa.e gar merā tirā insāf mahshar meñ na ho

ab talak to ye tavaqqo.a thī ki vaañ ho jā.egā

gar na andoh-e-shab-e-furqat bayan ho jaega

be-takalluf dagh-e-mah mohr-e-dahan ho jaega

zohra gar aisa hi sham-e-hijr mein hota hai aab

partaw-e-mahtab sail-e-KHanuman ho jaega

le to lun sote mein us ke panw ka bosa magar

aisi baaton se wo kafir bad-guman ho jaega

dil ko hum sarf-e-wafa samjhe the kya malum tha

yani ye pahle hi nazr-e-imtihan ho jaega

sab ke dil mein hai jagah meri jo tu raazi hua

mujh pe goya ek zamana mehrban ho jaega

gar nigah-e-garm farmati rahe ta’alim-e-zabt

shoala KHas mein jaise KHun-e-rag mein nihan ho jaega

bagh mein mujh ko na le ja warna mere haal par

har gul-e-tar ek chashm-e-KHun-fishan ho jaega

wae gar mera tera insaf mahshar mein na ho

ab talak to ye tawaqqoa thi ki wan ho jaega