گر نہ اندوہ شب فرقت بیاں ہو جائے گا

گر نہ اندوہ شب فرقت بیاں ہو جائے گا

بے تکلف داغ مہ مہر دہاں ہو جائے گا

زہرہ گر ایسا ہی شام ہجر میں ہوتا ہے آب

پرتو مہتاب سیل خانماں ہو جائے گا

لے تو لوں سوتے میں اس کے پاؤں کا بوسہ مگر

ایسی باتوں سے وہ کافر بد گماں ہو جائے گا

دل کو ہم صرف وفا سمجھے تھے کیا معلوم تھا

یعنی یہ پہلے ہی نذر امتحاں ہو جائے گا

سب کے دل میں ہے جگہ میری جو تو راضی ہوا

مجھ پہ گویا اک زمانہ مہرباں ہو جائے گا

گر نگاہ گرم فرماتی رہے تعلیم ضبط

شعلہ خس میں جیسے خون رگ میں نہاں ہو جائے گا

باغ میں مجھ کو نہ لے جا ورنہ میرے حال پر

ہر گل تر ایک چشم خوں فشاں ہو جائے گا

وائے گر میرا ترا انصاف محشر میں نہ ہو

اب تلک تو یہ توقع تھی کہ واں ہو جائے گا