jo dil ko mohabbat ke maze aae hue hain

jo dil ko mohabbat ke maze aa.e hue haiñ

vo apnī tabī'at pe abhī chhā.e hue haiñ

har baat pe iz.hār-e-nazākat hai hayā se

sābit hai ki taklīf bhī kuchh paa.e hue haiñ

kuchh tum ne hameñ dil meñ samajh rakhā hai samjho

kuchh ham bhī tumheñ zehn meñ Thahrā.e hue haiñ

phir milne ko jī chāhtā hai yaar kā ham se

nā-chār haiñ ġhussa meñ qasam khaa.e hue haiñ

allāh rī zid koThe ke chaḌhne ko kiyā tark

jis raaz se ham yaar ke ham-sā.e hue haiñ

ab dil ko lagāte haiñ zarā soch samajh kar

do-chār jagah pahle jo zak paa.e hue haiñ

kuchh dar pe jhukā.e hue sar baiThe haiñ 'sābir'

is bazm se shāyad ki nikalvā.e hue haiñ

jo dil ko mohabbat ke maze aae hue hain

wo apni tabi'at pe abhi chhae hue hain

har baat pe izhaar-e-nazakat hai haya se

sabit hai ki taklif bhi kuchh pae hue hain

kuchh tum ne hamein dil mein samajh rakha hai samjho

kuchh hum bhi tumhein zehn mein Thahrae hue hain

phir milne ko ji chahta hai yar ka hum se

na-chaar hain ghussa mein qasam khae hue hain

allah ri zid koThe ke chaDhne ko kiya tark

jis raaz se hum yar ke ham-sae hue hain

ab dil ko lagate hain zara soch samajh kar

do-chaar jagah pahle jo zak pae hue hain

kuchh dar pe jhukae hue sar baiThe hain 'sabir'

is bazm se shayad ki nikalwae hue hain