دفن جب خاک میں ہم سوختہ ساماں ہوں گے

دفن جب خاک میں ہم سوختہ ساماں ہوں گے

فلس ماہی کی گلِ شمعِ شبستاں ہوں گے

تو کہاں جائے گی کچھ اپنا ٹھکانہ کر لے

ہم تو کل خوابِ عدم میں شبِ ہجراں ہوں گے

ہم نکالیں گے سن اے موجِ ہوا بل تیرا

ان کی زلفوں کے اگر بال پریشاں ہوں گے

تابِ نظارہ نہیں آئینہ کیا دیکھنے دوں

اور بن جائیں گے تصویر جو حیراں ہوں گے

منتِ حضرتِ عیسیٰ نہ اٹھائیں گے کبھی

زندگی کے لئے شرمندۂ احساں ہوں گے

چاکِ پردہ سے یہ غمزے ہیں تو اے پردہ نشیں

ایک میں کیا کہ سبھی چاکِ گریباں ہوں گے

عمر ساری تو کٹی عشقِ بتاں میں مومنؔ

آخری وقت میں کیا خاک مسلماں ہوں گے