dil mera zulf-e-siyah Das gai nagin ban kar

dil mirā zulf-e-siyah Das ga.ī nāgin ban kar

be-gunāh dost ne maarā mujhe dushman ban kar

mar miTā jaan ga.ī rañj asīrī ke sahe

pā-e-bulbul ne ye phal 'āshiq-e-gulshan ban kar

us parī ne lab-e-gul rañg pe mastī jo malī

aur simTā vo dahan ġhuncha-e-sausan ban kar

haath uThāoge jo be-jurm mire qatl ko tum

teġh-e-bāzū se lipaT jā.egī joshan ban kar

baal us ne jo janāze pe mire khol diye

sab ne jaanā ki parī aa.ī hai jogan ban kar

aaj lo us gul kā 'ajab rañg huā pī ke sharāb

champa.ī gaal damakne lage kundan ban kar

dost jab tak hai ḳhudā kuchh nahīñ parvā ‘mūnis’

kyā karegā koī hāsid mirā dushman ban kar

dil mera zulf-e-siyah Das gai nagin ban kar

be-gunah dost ne mara mujhe dushman ban kar

mar miTa jaan gai ranj asiri ke sahe

pa-e-bulbul ne ye phal 'ashiq-e-gulshan ban kar

us pari ne lab-e-gul rang pe masti jo mali

aur simTa wo dahan ghuncha-e-sausan ban kar

hath uThaoge jo be-jurm mere qatl ko tum

tegh-e-bazu se lipaT jaegi joshan ban kar

baal us ne jo janaze pe mere khol diye

sab ne jaana ki pari aai hai jogan ban kar

aaj lo us gul ka 'ajab rang hua pi ke sharab

champai gal damakne lage kundan ban kar

dost jab tak hai KHuda kuchh nahin parwa ‘munis’

kya karega koi hasid mera dushman ban kar