دل مرا زلف سیہ ڈس گئی ناگن بن کر

دل مرا زلف سیہ ڈس گئی ناگن بن کر

بے گناہ دوست نے مارا مجھے دشمن بن کر

مر مٹا جان گئی رنج اسیری کے سہے

پائے بلبل نے یہ پھل عاشق گلشن بن کر

اس پری نے لب گل رنگ پہ مستی جو ملی

اور سمٹا وہ دہن غنچۂ سوسن بن کر

ہاتھ اٹھاؤ گے جو بے جرم مرے قتل کو تم

تیغ بازو سے لپٹ جائے گی جوشن بن کر

بال اس نے جو جنازے پہ مرے کھول دیئے

سب نے جانا کہ پری آئی ہے جوگن بن کر

آج لو اس گل کا عجب رنگ ہوا پی کے شراب

چمپئی گال دمکنے لگے کندن بن کر

دوست جب تک ہے خدا کچھ نہیں پروا مونسؔ

کیا کرے گا کوئی حاسد مرا دشمن بن کر