muddat hui hai yar ko mehman kiye hue

muddat huī hai yaar ko mehmāñ kiye hue

josh-e-qadah se bazm charāġhāñ kiye hue

kartā huuñ jam' phir jigar-e-laḳht-laḳht ko

'arsa huā hai dāvat-e-mizhgāñ kiye hue

phir vaz’-e-ehtiyāt se rukne lagā hai dam

barsoñ hue haiñ chaak garebāñ kiye hue

phir garm-nāla-hā-e-sharar-bār hai nafas

muddat huī hai sair-e-charāġhāñ kiye hue

phir pursish-e-jarāhat-e-dil ko chalā hai 'ishq

sāmān-e-sad-hazār namak-dāñ kiye hue

phir bhar rahā huuñ ḳhāma-e-mizhgāñ ba-ḳhūn-e-dil

sāz-e-chaman tarāzi-e-dāmāñ kiye hue

bāham-digar hue haiñ dil-o-dīda phir raqīb

nazzāra-o-ḳhayāl kā sāmāñ kiye hue

dil phir tavāf-e-kū-e-malāmat ko jaa.e hai

pindār kā sanam-kada vīrāñ kiye hue

phir shauq kar rahā hai ḳharīdār kī talab

’arz-e-matā-e-aql-o-dil-o-jāñ kiye hue

dauḌe hai phir har ek gul-o-lāla par ḳhayāl

sad gul-sitāñ nigāh kā sāmāñ kiye hue

phir chāhtā huuñ nāma-e-dildār kholnā

jaañ nazr-e-dil-farebi-e-’unvāñ kiye hue

māñge hai phir kisī ko lab-e-bām par havas

zulf-e-siyāh ruḳh pe pareshāñ kiye hue

chāhe hai phir kisī ko muqābil meñ aarzū

surme se tez dashna-e-mizhgāñ kiye hue

ik nau-bahār-e-nāz ko taake hai phir nigāh

chehra faroġh-e-mai se gulistāñ kiye hue

phir jī meñ hai ki dar pe kisī ke paḌe raheñ

sar zer-bār-e-minnat-e-darbāñ kiye hue

jī DhūñDtā hai phir vahī fursat ki raat din

baiThe raheñ tasavvur-e-jānāñ kiye hue

'ġhālib' hameñ na chheḌ ki phir josh-e-ashk se

baiThe haiñ ham tahayya-e-tūfāñ kiye hue

muddat hui hai yar ko mehman kiye hue

josh-e-qadah se bazm charaghan kiye hue

karta hun jam' phir jigar-e-laKHt-laKHt ko

'arsa hua hai dawat-e-mizhgan kiye hue

phir waz’-e-ehtiyat se rukne laga hai dam

barson hue hain chaak gareban kiye hue

phir garm-nala-ha-e-sharar-bar hai nafas

muddat hui hai sair-e-charaghan kiye hue

phir pursish-e-jarahat-e-dil ko chala hai 'ishq

saman-e-sad-hazar namak-dan kiye hue

phir bhar raha hun KHama-e-mizhgan ba-KHun-e-dil

saz-e-chaman taraazi-e-daman kiye hue

baham-digar hue hain dil-o-dida phir raqib

nazzara-o-KHayal ka saman kiye hue

dil phir tawaf-e-ku-e-malamat ko jae hai

pindar ka sanam-kada viran kiye hue

phir shauq kar raha hai KHaridar ki talab

’arz-e-mata-e-aql-o-dil-o-jaan kiye hue

dauDe hai phir har ek gul-o-lala par KHayal

sad gul-sitan nigah ka saman kiye hue

phir chahta hun nama-e-dildar kholna

jaan nazr-e-dil-farebi-e-’unwan kiye hue

mange hai phir kisi ko lab-e-baam par hawas

zulf-e-siyah ruKH pe pareshan kiye hue

chahe hai phir kisi ko muqabil mein aarzu

surme se tez dashna-e-mizhgan kiye hue

ek nau-bahaar-e-naz ko take hai phir nigah

chehra farogh-e-mai se gulistan kiye hue

phir ji mein hai ki dar pe kisi ke paDe rahen

sar zer-bar-e-minnat-e-darban kiye hue

ji DhunDta hai phir wahi fursat ki raat din

baiThe rahen tasawwur-e-jaanan kiye hue

'ghaalib' hamein na chheD ki phir josh-e-ashk se

baiThe hain hum tahayya-e-tufan kiye hue