KHud chali aaegi laila qais ka dil chahiye

ḳhud chalī aa.egī lailā qais kā dil chāhiye

'ishq meñ tāsīr hai par jazb-e-kāmil chāhiye

kyā dikhā.eñ hāl-e-ġham hai bahr-e-nā-paidā kanār

sar paTakne ke liye dariyā ko sāhil chāhiye

hai hamāre dam se zinda mad.h-e-husn-e-dilbarī

shohrat-e-gul ke liye shor-e-'anādil chāhiye

kah rahe haiñ mujh se vo ham bāñTte haiñ jins-e-'ishq

ham ko māñge ham se ḳhud par aisā sāhil chāhiye

teġh hai maujūd sar hāzir hai maqtal sāmne

bas faqat 'vāsil' ko ek tum saahī qātil chāhiye

KHud chali aaegi laila qais ka dil chahiye

'ishq mein tasir hai par jazb-e-kaamil chahiye

kya dikhaen haal-e-gham hai bahr-e-na-paida kanar

sar paTakne ke liye dariya ko sahil chahiye

hai hamare dam se zinda madh-e-husn-e-dilbari

shohrat-e-gul ke liye shor-e-'anadil chahiye

kah rahe hain mujh se wo hum banTte hain jins-e-'ishq

hum ko mange hum se KHud par aisa sahil chahiye

tegh hai maujud sar hazir hai maqtal samne

bas faqat 'wasil' ko ek tum sahi qatil chahiye