mujhe diwana mat samjho kisi ki KHak-e-pa hun main

mujhe dīvāna mat samjho kisī kī ḳhāk-e-pā huuñ maiñ

farishte jis ke darbāñ haiñ vo ḳhāk-āshnā huuñ maiñ

dikhā dūñgā tujhe naqsha unhī mad.hosh āñkhoñ kā

makān-o-lā-makāñ meñ lā-ilāh kī ik sadā huuñ maiñ

har ik jā gūñjtī bijlī hai jab lai-sa-kamislihī kī

kisī jā par fanā huuñ maiñ kisī jā par baqā huuñ maiñ

maiñ huuñ kasrat meñ jalva-gar nihāñ huuñ sirr-e-vahdat kā

nahīñ tum jānte mujh ko liqā-e-qibriyā huuñ maiñ

kabhī rañgoñ meñ be-rañg huuñ kabhī tashbīh meñ tanzīh huuñ

kabhī shāhān-e-shāh 'arshī faqīr-e-be-navā huuñ maiñ

fanā kaisī baqā kaisī jab us ke āshnā Thahre

na samjho ḳhaak kā putlā jamāl-e-kibriyā huuñ maiñ

na momin mujh ko lete haiñ na kāfir mujh ko lete haiñ

samajh meñ hī nahīñ aatī merī hastī ke kyā huuñ maiñ

mujhe diwana mat samjho kisi ki KHak-e-pa hun main

farishte jis ke darban hain wo KHak-ashna hun main

dikha dunga tujhe naqsha unhi madhosh aankhon ka

makan-o-la-makan mein la-ilah ki ek sada hun main

har ek ja gunjti bijli hai jab lai-sa-kamislihi ki

kisi ja par fana hun main kisi ja par baqa hun main

main hun kasrat mein jalwa-gar nihan hun sirr-e-wahdat ka

nahin tum jaante mujh ko liqa-e-qibriya hun main

kabhi rangon mein be-rang hun kabhi tashbih mein tanzih hun

kabhi shahan-e-shah 'arshi faqir-e-be-nawa hun main

fana kaisi baqa kaisi jab us ke aashna Thahre

na samjho KHak ka putla jamal-e-kibriya hun main

na momin mujh ko lete hain na kafir mujh ko lete hain

samajh mein hi nahin aati meri hastī ke kya hun main