supurd-e-husn-e-azal mail-e-baqa ho ja

supurd-e-husn-e-azal mā.il-e-baqā ho jā

fanā-e-'ishq kī takmīl meñ fanā ho jā

hai ibtidā hī se ġhaflat jo intihā kī mujhe

kar ibtidā vo ab apnī ki intihā ho jā

usī se nīstī be-gāngī kī mumkin hai

ki apne jauhar-e-hastī se āshnā ho jā

yahī hai fat.h-e-haqīqat yahī shikast-e-majāz

ki apne husn-e-nihānī pe ḳhud fidā ho jā

rahe mudām-e-nazar terī apne markaz par

muhīt-e-dā.ira-e-tā'at-o-razā ho jā

nihāñ nishāt-e-davāmī kā raaz us meñ hai

jo dil ke saaz se paidā ho vo sadā ho jā

bahut liyā hai munavvar zabān-e-ma.āl se kaam

zabān-e-hāl se bhī ab suḳhan-sarā ho jā

supurd-e-husn-e-azal mail-e-baqa ho ja

fana-e-'ishq ki takmil mein fana ho ja

hai ibtida hi se ghaflat jo intiha ki mujhe

kar ibtida wo ab apni ki intiha ho ja

usi se nisti be-gangi ki mumkin hai

ki apne jauhar-e-hasti se aashna ho ja

yahi hai fath-e-haqiqat yahi shikast-e-majaz

ki apne husn-e-nihani pe KHud fida ho ja

rahe mudam-e-nazar teri apne markaz par

muhit-e-daira-e-ta'at-o-raza ho ja

nihan nishat-e-dawami ka raaz us mein hai

jo dil ke saz se paida ho wo sada ho ja

bahut liya hai munawwar zaban-e-maal se kaam

zaban-e-haal se bhi ab suKHan-sara ho ja