سپرد حسن ازل مائل بقا ہو جا

سپرد حسن ازل مائل بقا ہو جا

فنائے عشق کی تکمیل میں فنا ہو جا

ہے ابتدا ہی سے غفلت جو انتہا کی مجھے

کر ابتدا وہ اب اپنی کہ انتہا ہو جا

اسی سے نیستی بے گانگی کی ممکن ہے

کہ اپنے جوہر ہستی سے آشنا ہو جا

یہی ہے فتح حقیقت یہی شکست مجاز

کہ اپنے حسن نہانی پہ خود فدا ہو جا

رہے مدام نظر تیری اپنے مرکز پر

محیط دائرہ طاعت و رضا ہو جا

نہاں نشاط دوامی کا راز اس میں ہے

جو دل کے ساز سے پیدا ہو وہ صدا ہو جا

بہت لیا ہے منور زبان مآل سے کام

زبان حال سے بھی اب سخن سرا ہو جا