jab tere simTe hue jalwon ko phailata hun main

jab tire simTe hue jalvoñ ko phailātā huuñ maiñ

ek dil meñ do jahāñ kī vus’ateñ paatā huuñ maiñ

hosh ho jaate haiñ gum jab hosh meñ aatā huuñ maiñ

yaad kiyā karatā huuñ tujh ko bhuul sā jaatā huuñ maiñ

merī 'azmat dīdanī hai 'ālam-e-asbāb meñ

ḳhvāb terā hai magar tā’bīr farmātā huuñ maiñ

jāntā huuñ ye ki 'arz-e-shauq hai tauhīn-e-shauq

phir bhī 'arz-e-shauq par majbūr ho jaatā huuñ maiñ

ā.īne meñ shakl āḳhir kyā ye paidā ho ga.ī

tū nazar aatā hai us meñ yā nazar aatā huuñ maiñ

kuchh tirī shān-e-karam kā āgayā mujh ko ḳhayāl

varna tire sāmne kab haath phailātā huuñ maiñ

zindagī hī zindagī kī ibtidā aa.ī nazar

zindagī ko zindagī kī intihā paatā huuñ maiñ

marg-o-hastī bā'is-e-zahmat nahīñ mere liye

khel haiñ ye do dil apnā jin se bahlātā huuñ maiñ

ye bhī sach hai vahm kar detā hai aksar bad-gumāñ

ye bhī sach hai terī hastī par yaqīñ laatā huuñ maiñ

jab tere simTe hue jalwon ko phailata hun main

ek dil mein do jahan ki wus’aten pata hun main

hosh ho jate hain gum jab hosh mein aata hun main

yaad kiya karata hun tujh ko bhul sa jata hun main

meri 'azmat didani hai 'alam-e-asbab mein

KHwab tera hai magar ta’bir farmata hun main

jaanta hun ye ki 'arz-e-shauq hai tauhin-e-shauq

phir bhi 'arz-e-shauq par majbur ho jata hun main

aaine mein shakl aaKHir kya ye paida ho gai

tu nazar aata hai us mein ya nazar aata hun main

kuchh teri shan-e-karam ka aagaya mujh ko KHayal

warna tere samne kab hath phailata hun main

zindagi hi zindagi ki ibtida aai nazar

zindagi ko zindagi ki intiha pata hun main

marg-o-hasti ba'is-e-zahmat nahin mere liye

khel hain ye do dil apna jin se bahlata hun main

ye bhi sach hai wahm kar deta hai aksar bad-guman

ye bhi sach hai teri hasti par yaqin lata hun main