wo jo suKHan-taraaz ho KHud mere dam pe aa bane

vo jo suḳhan-tarāz ho ḳhud mere dam pe aa bane

jis se savāl maiñ karūñ us se javāb kyā bane

'arsh ko yuuñ banā.e farsh farsh ko yuuñ banā.e 'arsh

gard-e-rah-e-vafā bane dil terī ḳhāk-e-pā bane

kaash tum is kā faisla mere hī dil pe chhoḌ do

kis kī maiñ bandagī karūñ kaun mirā ḳhudā bane

jumbish-e-lab dam-e-talab jumbish-e-rā.egāñ na hoñ

jis meñ ho jazb-e-dil sharīk sirf vahī du'ā bane

mil ke rahegā ḳhud-baḳhud manzil-e-shauq kā surāġh

koī na rāsta batā.e koī na rahnumā bane

kyuuñ na balā.eñ lījiye husn-e-sitam zarīf kī

aap hī ā.īna dikhā.e aap hī ḳhud-numā bane

dil pe ta.alluqāt kā rañg chaḌhe kuchh is tarh

aap hī ḳhud se ġhair ho aap hī āshnā bane

mujh ko 'munavār' is qadar talkHī-e-zīst hai pasand

ho bhī jo qismat-rasā qismat-e-nā-rasā bane

wo jo suKHan-taraaz ho KHud mere dam pe aa bane

jis se sawal main karun us se jawab kya bane

'arsh ko yun banae farsh farsh ko yun banae 'arsh

gard-e-rah-e-wafa bane dil teri KHak-e-pa bane

kash tum is ka faisla mere hi dil pe chhoD do

kis ki main bandagi karun kaun mera KHuda bane

jumbish-e-lab dam-e-talab jumbish-e-raegan na hon

jis mein ho jazb-e-dil sharik sirf wahi du'a bane

mil ke rahega KHud-baKHud manzil-e-shauq ka suragh

koi na rasta batae koi na rahnuma bane

kyun na balaen lijiye husn-e-sitam zarif ki

aap hi aaina dikhae aap hi KHud-numa bane

dil pe talluqat ka rang chaDhe kuchh is tarh

aap hi KHud se ghair ho aap hi aashna bane

mujh ko 'munawar' is qadar talkHi-e-zist hai pasand

ho bhi jo qismat-rasa qismat-e-na-rasa bane