na kar behosh wan tak tu mujhe hushyar jaane de

na kar behosh vaañ tak tū mujhe hushyār jaane de

tajallī-gāh tak shauq-e-jamāl-e-yār jaane de

na rah pāband-e-kufr-o-dīñ ġharaz rakh us kī ulfat se

jo 'āshiq hai to qaid jaane va zunnār jaane dai

qasam hai tujh ko ai dast-e-junūñ saudā-e-kākul kī

jo ik tār-e-garebāñ tak mirā be-kār jaane de

bhalā kyā fā.ida kholūñ jo maiñ shikvoñ ke daftar ko

yuuñ hī rahne de us ko gomago ai yaar jaane de

lagāvaT chiḌh hai zāhirdāriyoñ se un ko nafrat hai

na kar ye chāplūsī mujh se o 'ayyār jaane de

baras kar to na Thahrā chashm-e-tūfāñ-zāñ ko rone par

na de āñkhoñ ko chhaTne abr-e-gauhar-bār jaane de

na le jins-e-mohabbat de ke dil bāzār-e-ulfat meñ

ye saudā bech degā 'rind' ye bevpār jaane de

na kar behosh wan tak tu mujhe hushyar jaane de

tajalli-gah tak shauq-e-jamal-e-yar jaane de

na rah paband-e-kufr-o-din gharaz rakh us ki ulfat se

jo 'ashiq hai to qaid jaane wa zunnar jaane dai

qasam hai tujh ko ai dast-e-junun sauda-e-kakul ki

jo ek tar-e-gareban tak mera be-kar jaane de

bhala kya faida kholun jo main shikwon ke daftar ko

yun hi rahne de us ko gomago ai yar jaane de

lagawaT chiDh hai zahirdariyon se un ko nafrat hai

na kar ye chaplusi mujh se o 'ayyar jaane de

baras kar to na Thahra chashm-e-tufan-zan ko rone par

na de aankhon ko chhaTne abr-e-gauhar-bar jaane de

na le jins-e-mohabbat de ke dil bazar-e-ulfat mein

ye sauda bech dega 'rind' ye bewpar jaane de