نہ کر بے ہوش واں تک تو مجھے ہشیار جانے دے

نہ کر بے ہوش واں تک تو مجھے ہشیار جانے دے

تجلی گاہ تک شوق جمال یار جانے دے

نہ رہ پابند کفر و دیں غرض رکھ اس کی الفت سے

جو عاشق ہے تو قید جانے و زنار جانے دے

قسم ہے تجھ کو اے دست جنوں سودائے کاکل کی

جو اک تار گریباں تک مرا بیکار جانے دے

بھلا کیا فائدہ کھولوں جو میں شکوؤں کے دفتر کو

یوں ہی رہنے دے اس کو گو مگو اے یار جانے دے

لگاوٹ چڑھ ہے ظاہر داریوں سے ان کو نفرت ہے

نہ کر یہ چاپلوسی مجھ سے او عیار جانے دے

برس کر تو نہ ٹھہرا چشم طوفاں زاں کو رونے پر

نہ دے آنکھوں کو چھٹنے ابر گوہر بار جانے دے

نہ لے جنس محبت دے کے دل بازار الفت میں

یہ سودا بیچ دے گا رندؔ یہ بیوپار جانے دے