nawak-e-naz se mushkil hai bachana dil ka

nāvak-e-nāz se mushkil hai bachānā dil kā

dard uTh uTh ke batātā hai Thikānā dil kā

lauT jaate the hasīñ dekh ke aanā dil kā

kyā muāfiq thā javānī meñ zamāna dil kā

kahte haiñ kyā maiñ karūñ sun ke fasānā dil kā

vahī jhagḌā vahī dukhḌā hai purānā dil kā

āfrīñ kahne se ruk jaatā hai qātil merā

lazzat-e-qatl ghaTātā hai baḌhānā dil kā

is ne dekhā use aur us ne ise dekh liyā

ab to dushvār hai pahlū meñ chhupānā dil kā

aaj is shauq se paikāñ mere dil meñ aayā

aa gayā yaad kisī shoḳh par aanā dil kā

haa.e vo pahlī mulāqāt meñ merā ruknā

aur us kā vo lagāvaT se baḌhānā dil kā

ishq meñ sabr kahāñ zabt kahāñ taab kahāñ

jaan jaanā nahīñ hamdam ye hai jalnā dil kā

nichle baiThe raho qadmoñ pe paḌā rahne do

dekho achchhā nahīñ ai jaan uThānā dil kā

qais kam-zarf thā farhād tañg-hausla thā

dil lagī ham to samajhte haiñ lagānā dil kā

siina chhalnī kiye detī haiñ nigāheñ un kī

DhūñDte phirte haiñ ye tiir Thikānā dil kā

yuuñ na haath aa.egā ye maal kabhī duzd-e-hinā

siikh duzdīda nigāhī se churānā dil kā

muttasil aah kī pahlū se sadā aatī hai

ab vo hai dard kā ghar thā jo Thikānā dil kā

nigah-e-nāz se kahte haiñ uḌā de us ko

sāmne aa hī gayā ab to nishānā dil kā

jī lage aap kā aisā ki kabhī jī na bhare

dil lagā kar jo suneñ aap fasānā dil kā

hasrat-o-dard kā allāh re furqat meñ hujūm

ki nahīñ ab kisī goshe meñ Thikānā dil kā

dil mirā le ke dikhā dī mujhe muTThī ḳhālī

phir kahā dekh liyā haath se jaanā dil kā

haaye vo dekh ke ubhrā huā joban un kā

donoñ hāthoñ se mirā shab ko dabānā dil kā

mashrab-e-ishq meñ kaisī haiñ ye ulTī bāteñ

dil ke jaane ko ye kyuuñ kahte haiñ aanā dil kā

dil jo diiñ un se to ai jaan ye gahrā parda

aur ravā rakhte ho parde meñ bhī aanā dil kā

kisī pahlū pe vo aa.eñ magar aa.eñ to sahī

na suneñ baat mirī sun leñ fasānā dil kā

garmiyāñ karne kā hai ḳhuub salīqa un ko

sīkho āñkhoñ kī sharārat se jalānā dil kā

pher kar muñh mujhe taḌpāte haiñ aur kahte haiñ

ruḳh badal kar ham uḌāte haiñ nishānā dil kā

jitne armān the jī bhar ke nikāle ai jaan

vasl meñ luuT liyā tum ne ḳhazānā dil kā

nigah-e-nāz se ġhamze ne kahā taḌpā kar

yuuñ uḌā dete haiñ ustād nishānā dil kā

har nigah-e-vasl meñ us shoḳh kī kahtī hai 'amīr'

ho jise hukm uḌā de vo nishānā dil kā

nawak-e-naz se mushkil hai bachana dil ka

dard uTh uTh ke batata hai Thikana dil ka

lauT jate the hasin dekh ke aana dil ka

kya muafiq tha jawani mein zamana dil ka

kahte hain kya main karun sun ke fasana dil ka

wahi jhagDa wahi dukhDa hai purana dil ka

aafrin kahne se ruk jata hai qatil mera

lazzat-e-qatl ghaTata hai baDhana dil ka

is ne dekha use aur us ne ise dekh liya

ab to dushwar hai pahlu mein chhupana dil ka

aaj is shauq se paikan mere dil mein aaya

aa gaya yaad kisi shoKH par aana dil ka

hae wo pahli mulaqat mein mera rukna

aur us ka wo lagawaT se baDhana dil ka

ishq mein sabr kahan zabt kahan tab kahan

jaan jaana nahin hamdam ye hai jalna dil ka

nichle baiThe raho qadmon pe paDa rahne do

dekho achchha nahin ai jaan uThana dil ka

qais kam-zarf tha farhad tang-hausla tha

dil lagi hum to samajhte hain lagana dil ka

sina chhalni kiye deti hain nigahen un ki

DhunDte phirte hain ye tir Thikana dil ka

yun na hath aaega ye mal kabhi duzd-e-hina

sikh duzdida nigahi se churana dil ka

muttasil aah ki pahlu se sada aati hai

ab wo hai dard ka ghar tha jo Thikana dil ka

nigah-e-naz se kahte hain uDa de us ko

samne aa hi gaya ab to nishana dil ka

ji lage aap ka aisa ki kabhi ji na bhare

dil laga kar jo sunen aap fasana dil ka

hasrat-o-dard ka allah re furqat mein hujum

ki nahin ab kisi goshe mein Thikana dil ka

dil mera le ke dikha di mujhe muTThi KHali

phir kaha dekh liya hath se jaana dil ka

haye wo dekh ke ubhra hua joban un ka

donon hathon se mera shab ko dabana dil ka

mashrab-e-ishq mein kaisi hain ye ulTi baaten

dil ke jaane ko ye kyun kahte hain aana dil ka

dil jo din un se to ai jaan ye gahra parda

aur rawa rakhte ho parde mein bhi aana dil ka

kisi pahlu pe wo aaen magar aaen to sahi

na sunen baat meri sun len fasana dil ka

garmiyan karne ka hai KHub saliqa un ko

sikho aankhon ki shararat se jalana dil ka

pher kar munh mujhe taDpate hain aur kahte hain

ruKH badal kar hum uDate hain nishana dil ka

jitne arman the ji bhar ke nikale ai jaan

wasl mein luT liya tum ne KHazana dil ka

nigah-e-naz se ghamze ne kaha taDpa kar

yun uDa dete hain ustad nishana dil ka

har nigah-e-wasl mein us shoKH ki kahti hai 'amir'

ho jise hukm uDa de wo nishana dil ka