aaj kHum-kHana-e-wahdat se pila de saqi

aaj kHum-kHāna-e-vahdat se pilā de saaqī

sar-basar naqsh-e-duī dil se miTā de saaqī

mahviyat ho jise paikar vo pilā de saaqī

dil merā qulqul-e-mīnā kī sadā de saaqī

jām-e-'irfāñ se pilā de vo mai-e-ātish-rañg

dil-e-birishta ho kabāboñ kā maza de saaqī

bāda-e-nāb se de jaam bilorīñ bhar kar

maah meñ mehr kī sūrat ko dikhā de saaqī

bai'at-e-pīr-e-muġhāñ karne lage haiñ mai-kash

mujh ko apnā hī piyāla tu pilā de saaqī

toḌ duuñ mohr bahār aa ga.ī dīvāna huuñ

hai jo shīsha meñ parī mujh ko batā de saaqī

jis ko pī kar ho shagufta dil-e-be-tāb 'na.īm'

phuul sī ab vo gulābī sī pilā de saaqī

aaj kHum-kHana-e-wahdat se pila de saqi

sar-basar naqsh-e-dui dil se miTa de saqi

mahwiyat ho jise paikar wo pila de saqi

dil mera qulqul-e-mina ki sada de saqi

jam-e-'irfan se pila de wo mai-e-atish-rang

dil-e-birishta ho kababon ka maza de saqi

baada-e-nab se de jam bilorin bhar kar

mah mein mehr ki surat ko dikha de saqi

bai'at-e-pir-e-mughan karne lage hain mai-kash

mujh ko apna hi piyala tu pila de saqi

toD dun mohr bahaar aa gai diwana hun

hai jo shisha mein pari mujh ko bata de saqi

jis ko pi kar ho shagufta dil-e-be-tab 'naim'

phul si ab wo gulabi si pila de saqi