nahin zaKHm-e-dil ab dikhane ke qabil

nahīñ zaḳhm-e-dil ab dikhāne ke qābil

ye nāsūr hai bas chhupāne ke qābil

tere rū-ba-rū aa.uuñ kis muñh se pyāre

nahīñ ab rahā muñh dikhāne ke qābil

vufūr-e-ġham-e-yās ne aisā gherā

na chhoḌā kahīñ aane jaane ke qābil

shab-e-hijr kī talḳhiyāñ kuchh na pūchho

nahīñ dāstāñ ye sunāne ke qābil

ye Thukrā ke dil phir kahā muskurā kar

na thā dil ye dil se lagāne ke qābil

jo dekhā mujhe pher liiñ apnī āñkheñ

na jaanā mujhe muñh lagāne ke qābil

terī bazm meñ saikḌoñ aa.e baiThe

hamī ek the kyā uThāne ke qābil

ye kāfir nigāheñ ye dilkash adā.eñ

nahīñ kuchh rahā ab bachāne ke qābil

dayār-e-mohabbat ke sultāñ se kah do

ye vīrāñ kada hai basāne ke qābil

kiyā zikr dil kā to hañs kar vo bole

nahīñ hai ye dil rahm khāne ke qābil

nigāh-e-karam yuuñ hī rakhnā ḳhudārā

na maiñ huuñ na dil āzmāne ke qābil

nishān-e-kaf-e-pā-e-jānāñ pe yārab

hamārā ye sar ho jhukāne ke qābil

kabhī qabr-e-'mushtāq' par se jo guzre

kahā ye nishāñ hai miTāne ke qābil

nahin zaKHm-e-dil ab dikhane ke qabil

ye nasur hai bas chhupane ke qabil

tere ru-ba-ru aaun kis munh se pyare

nahin ab raha munh dikhane ke qabil

wufur-e-gham-e-yas ne aisa ghera

na chhoDa kahin aane jaane ke qabil

shab-e-hijr ki talKHiyan kuchh na puchho

nahin dastan ye sunane ke qabil

ye Thukra ke dil phir kaha muskura kar

na tha dil ye dil se lagane ke qabil

jo dekha mujhe pher lin apni aankhen

na jaana mujhe munh lagane ke qabil

teri bazm mein saikDon aae baiThe

hami ek the kya uThane ke qabil

ye kafir nigahen ye dilkash adaen

nahin kuchh raha ab bachane ke qabil

dayar-e-mohabbat ke sultan se kah do

ye viran kada hai basane ke qabil

kiya zikr dil ka to hans kar wo bole

nahin hai ye dil rahm khane ke qabil

nigah-e-karam yun hi rakhna KHudara

na main hun na dil aazmane ke qabil

nishan-e-kaf-e-pa-e-jaanan pe yarab

hamara ye sar ho jhukane ke qabil

kabhi qabr-e-'mushtaq' par se jo guzre

kaha ye nishan hai miTane ke qabil