kyun mujhse nazar pheri ai murshid-e-mai-KHana

kyuuñ mujh se nazar pherī ai murshid-e-mai-ḳhāna

dariyā ke paas aakar pyāsā rahā mastāna

pūchhā na kabhī tū ne hāl-e-dil-e-dīvāna

sham.a terī mahfil meñ jaltā rahā parvāna

barq falak chaman meñ kyuuñ jhāñktī phirtī hai

gulshan meñ yā ilāhī kis kā hai āshiyāna

kuchh aas le ke dil meñ laayā huuñ dil ko apne

ai tirchhī nazar vaale ik is taraf nishāna

sargarm guftugū the ġhairoñ se sar-e-mahfil

apne hī fidā.ī ko tū ne nahīñ pahchānā

phir tū ne bulāyā hai mahfil meñ 'āshiqoñ ko

kyā terā irāda hai ai jalva-e-jānāna

le kar bahār-e-bustāñ aayā hai dil qafas meñ

vīrāne meñ ābādī ābādī meñ vīrāna

ik kaif hai āñkhoñ meñ kaif meñ āñkheñ haiñ

dīvāne meñ mastī hai mastī meñ hai dīvāna

be-par ke uḌ rahe haiñ pī-pī ke jām-e-'irfāñ

saaqī kā mai-kada bhī 'nāzāñ' hai parī-ḳhāna

kyun mujh se nazar pheri ai murshid-e-mai-KHana

dariya ke pas aakar pyasa raha mastana

puchha na kabhi tu ne haal-e-dil-e-diwana

shama teri mahfil mein jalta raha parwana

barq falak chaman mein kyun jhankti phirti hai

gulshan mein ya ilahi kis ka hai aashiyana

kuchh aas le ke dil mein laya hun dil ko apne

ai tirchhi nazar wale ek is taraf nishana

sargarm guftugu the ghairon se sar-e-mahfil

apne hi fidai ko tu ne nahin pahchana

phir tu ne bulaya hai mahfil mein 'ashiqon ko

kya tera irada hai ai jalwa-e-jaanana

le kar bahaar-e-bustan aaya hai dil qafas mein

virane mein aabaadi aabaadi mein virana

ek kaif hai aankhon mein kaif mein aankhen hain

diwane mein masti hai masti mein hai diwana

be-par ke uD rahe hain pi-pi ke jam-e-'irfan

saqi ka mai-kada bhi 'nazan' hai pari-KHana